E siman aki Bon Dia Aruba a combersa cu algun chauffeur di truck cu ta suplica pa e caminda di Barcadera wordo drecha pasobra esaki ta treciendo problema na e vehiculonan. Director di DOW Marlon Croes ta splica awor cu e motibo dicon no por a drecha e caretera di Barcadera prome cu a muda e waf for di Oranjestad ta pa falta di fondo.
E caminda di Barcadera ta uno cu a wordo traha basta aña pasa anto e ta un proceso di cual DOW a premira cu nan ta bay tin mester di haci trabao di mantencion. Segun Sr. Croes, e caminda ta wordo uza hopi mas awor cu e waf a muda anto p’esey tambe en berdad esaki mester di un capa nobo pasobra e ta decadanan bieu. ”Nos ta bezig cu Green Corridor cu tin e ‘pre-work’ cu ta sali for di Sero Teishi bay pa waf y eynan e conexion nobo lo ta cu mester brinda e trafico cu ta move for di paden pa waf y vice versa, mester duna accesibilidad na un manera mas rapido y di miho calidad.”
Den e ROP (plan di desaroyo teritorial), ta ilustra e situacion actual cu un enfoke di tres capa cual ta: efecto di interaccion entre uzo di teritorio y subsuela natural, e conexion den e rednan y e actividadnan social den e capa di ocupacion. E capa di red ta e maneho cu ta dirigi un miho funcionamento di e red di caretera como sistema di conexionnan principal y pa construi e conexionnan cu falta. E pida caminda di e Green Corridor cu ta conecta na e caminda bieu di Barcadera biniendo pa entrada di waf, lo mester wordo drecha como tambe e caminda mes via di Barcadera unda cu tin AruGas bayendo direccion Aruba Ports Authority tambe mester wordo haci di cual DOW tin un plan traha caba.
Cifranan
E cifranan cu DOW tin pa drecha e caminda aki cu ta bay via e crusada di Mahuma pa Barcadera, ta un suma di 600.000 florin y esun di Barcadera pa waf ta entre 275.000 pa 300.000 florin. Akinan nos ta papiando pa e careteranan aki so sin laga afo cu otronan por sali mesun caro of te hasta mas.
Tapa buraco te ora no por mas
DOW ta admiti cu ora cu tin buraco den caminda, basicamente ta laat. Bon Dia Aruba a tuma nota cu na varios caminda rond di Aruba cu tin buraco, e buraconan ta wordo tapa pero e caminda mes no ta haya un renobacion completo. Ta tapa buraco tur caminda te ora cu tin un serie di buraconan tapa riba e caminda. Ora cu bo core riba e camindanan aki bo auto ta bati asina hopi cu esaki por hiba bo bek den tempo di ‘pica piedra’ , ora di coremento di cabay y burico na Aruba. Sr. Croes ta bisa cu: ”Pa motibonan presupuestario nos ta ‘patch’ e camindanan. Nos ta purba di cambia e metodo di enbes di e bay yega na estado cu e ta kibra pa despues bo bay drech’e, nos ta bay wak, analisa si tin scheur of algun buraco chikito anto ta corta cuadrante di dje of bo ta ‘re surface e completo pa extende e duracion di e caretera.
