Director di Departamento di Obra Publico (DOW) Marlon Croes durante un conferencia di prensa ayera atardi a divulga informacion riba kico a pasa cu e mangelnan na Santo Largo.
Sr. Croes a splica cu pa evalua e rason dicon e mangelnan na Santo Largo lo a cuminsa muri e departamento a dicidi di haci un estudio hunto cu 2 organisacion pa asina determina e miho manera pa restaura e mangelnan. E organisacionnan tabata Directie Natuur en Milieu (DNM) y Wageningen Environmental Research (Alterra). E director a splica tambe cu DOW kier mehora e accesibilidad di informacion pa publico, pues DOW a publica e rapportnan aki riba nan medionan social y website.
Sr. Croes a sigui bisa cu e rapportnan ta skirbi den un lenguahe ‘simpel y straight forward’, pues lo ta facil pa tur hende comprende esaki. Sinembargo actualmente Bon Dia no por haya e rapportnan aki riba website di DOW ni riba medionan social y ta wardando contesta di parti di e manager di comunicacion di DOW pa asina haya un copia di e rapportnan.
Cantidad halto di salo den awa a contribui na morto
Un punto cu sr. Croes a enfatisa cu DOW como organisacion ta responsabel pa gran parti di proyectonan di infrastructura cu ta tuma luga riba nos isla, sinembargo esaki no kiermen cu DOW ta su so den e trabounan cu ta trata infrastructura. Tin varios stakeholder nan cu tambe ta hunga un rol den e parti di infrastructura: tanto WEB, Elmar y Setar como utilidadnan, como contratista cu ta traha pa un di e companianan aki of DOW mes.
“Esaki por crea confusion riba ken mester carga responsabilidad di trabounan cu ta wordo haci.”
Sr. Croes a elabora riba esaki mirando cu personanan riba medionan social a laba man cu DOW despues cu organisacion ambiental Aruba Birdlife Conservation a publica potretnan di e mangelnan muriendo. E director a desmenti cu esaki lo tabata a causa di un acto haci pa DOW, specificamente di e caya cu DOW a construi hunto cu Odinsa. E cantidad di salo tabata e causa di e morto di e mangelnan, segun sr. Croes. E director a splica cu e mangelnan aki no tabata existi mucho tempo den e saliña unda nan a crece, cual el a remarca ta un tereno priva. “Si bo mira potretnan di e area desde 1957 bay ariba, ta notabel cu e area tabata bashi. Ta te despues di 2004 cu un condicion faborabel a wordo crea pa asina e mangelnan por a crece.”
Un posibel splicacion pa e crecemento di e mangelnan ta cu segun sr. Croes tin un tuberia cu a wordo tira pa un partido desconoci. E departamento tampoco ta na altura ki tempo e tuberia a wordo tira. E tuberia aki a percura pa tin un flow constante di awa salo cu ta drenta y sali e saliña cada biaha cu nivel di lama subi y baha, cual a percura pa un condicion faborabel di nivel di salo balansa.
Tur esaki e estudionan di DNM y Alterra tambe ta splica. E nivel di salo pues a subi despues cu e compania di utilidad a tira liñanan pa conecta su planta cu refineria den transcurso di aña 2016. Despues cu DOW a realisa esaki nan a acerca e compania di utilidad pa urgi nan pa reestablece un tuberia entre lama y saliña, na recomendacion di ambos DNM y Alterra.
Algun trabou a wordo haci pa drecha e tubonan aki maart ultimo, tanto como den ultimo weekend, segun e director. Si e trabounan cu a wordo haci lo reestablece e salud di e mangelnan no ta conoci ainda pa e departamento. Sinembargo e director a expresa cu lo mester warda pa mira kico e efecto lo ta di e trabounan cu a wordo haci despues cu e condicionnan faborabel a wordo reestableci.
“Alterra a bisa nos cu muy probablemente tin mangelnan cu a muri cu no por bin bek mas. Sinembargo durante e fin di siman ultimo ora nos a bay haci e trabounan na altura di e mangelnan nos por a nota cu algun mangel a cuminsa saca blachi nobo despues cu awa cero a cay, cual a yuda baha e nivel di salo den e awa.” Segun sr. Croes, DNM lo sigui monitor e nivel di salo den saliña regularmente pa asina mira desaroyo den bida di e mangelnan. E departamento a admiti cu nan tabatin un bon intencion ora nan a pomp awa den e saliña algun tempo atras, pero esaki a resulta di ta algo negativo pa via di e secura. E secura aki a percura pa ora cu e awa a vapora tabatin un concentracion mas halto di salo den e awa, cual posiblemente a contribui na e situacion actual.
Un aspecto cu a wordo debati tabata dicon e departamento ta inverti den un saliña cu ta propiedad di un persona priva. Kinan e director a expresa cu e mangelnan ta un atraccion pa tanto turista como localnan y tambe cu e departamento ta kere cu mester salvaguardia naturalesa di nos isla. Sinembargo nan tin responsabilidad di laga tur tereno priva cu ta cerca di proyectonan mescos cu prome nan a ehecuta e proyecto.
Nos por a mira den pasado cu e departamento a yega di haci rosamento den diferente area sin consideracion pa e repercusionnan pa nos naturalesa. Sinembargo cu ultimo desaroyonan den area di Sero Cristal y awo Santo Largo DOW a mustra un cara nobo pa loke ta trata transparencia y admiti fout. Den ambos caso por a mira cu participacion civil y accion di parti di organisacionnan ambiental a hunga un rol importante.
