Recientemente Bon Dia a publica un relato na unda cu Hospital Horacio Oduber tabata tin un derame di diesel, caminda cu 10.000 liter a lek y parcialmente a drenta Bubali plas.
E team di DOW atendiendo cu e calamidad a constata cu no obstante e esfuersonan realisa toch diesel a logra drenta e canal pa bay na Bubali Plas cual ta menasa seriamente e santuario.
Despues di 2 dia y mey di esfuerso ‘nonstop di staf di DOW, y su contratistanan a logra contene e diesel pa e no causa un desaster na habitat di Bubali Plas’, segun e relato cu nos a ricibi di DOW.
“Aki ta unda decisionnan clave a wordo tuma y cu hopi cautela y precision a tuma e pasonan necesario pa asina logra e meta pa e diesel no yega den Bubali Plas. Y diadomingo merdia despues di e analisis cu Directie Natuur & Milieu a haci tanto di Bubali Plas como den e planta di tratamento di awa residual, a conclui cu e nivel di oxigeno den e awa di Bubali Plas y tambe den e planta ta bon atrobe. Esey kiermen cu por a bay over pa trece awa cu bacteria activo for di planta di Parkietenbos pa jumpstart e proceso den e aeratietank. Ora cu e proceso aki ta bou di control lo bolbe cuminsa manda awa pa Bubali Plas”, asina e departamento ta informa.
