Diahuebs mainta Minister Otmar Oduber conhuntamente cu expertonan di D.O.W. a anuncia continuacion di Paradera Corridor. Fase 3 di Paradera Corridor lo enfoca un poco mas riba e area di Piedra Plat segun Ing. Francis Gomes. Ta trata aki di e area cuminsando pabou di Bright Bakery y lo yega te cu Santa Rosa. E parti aki lo keda parti den dos etapa. E prome parti lo ta di Bright Bakery te cu e crusada na Leopoldo Croes Ballpark cu ta inclui un cambio grandi den e infrastructura cu lo inclui un rotonde na e t-kruising di Bright Bakery aliviando asina e fluho di trafico. E trafico den oranan peek ta pega cu filanan di auto cu ta bin for di banda di Bright Bakery y lo kier bira bay sea banda drechi of robes, of di autonan cu ta bini for di e direccion di Leopoldo Croes Ballpark y lo kier bira bay riba e caminda banda di Bright Bakery.
A scoge e tipo di rotonde plat unda e vehiculo lo por pasa riba dje manera nos conoce den e trafico den Oranjestad banda di Banco di Caribe cu su iluminacion apropia. Intencion ta pa inicia cu e trabounan aki na inicio di september proximo y dentro di 3 pa 4 luna e lo mester keda completa. Mirando e tipo di rotonde cu a scoge pa construi por bisa cu e lo ta un trabou relativamente rapido y durante e temporada cu e trabounan tin cu tuma luga lo tin desviacion di trafico adecuado pa asina percura cu tur hende cu ta frecuenta e area por sigui haci uzo di e rutanan aki.
Pa locual ta trata e aspecto di embeyecemento di e area por menciona lo conta cu entre otro un fietspad panort di caminda y tambe un looppad, sin laga afo mata berde na ambos banda. E profesionalnan di D.O.W. ta comenta cu lo pone extra atencion pa locual ta trata drenahe di awa pa evita cu awa di yobida keda para na cierto partinan.
D.O.W. awor lo percura pa un looppad cu menos interupcion pa percura cu mas hende lo por experiencia canamento den un forma mas agradabel riba Paradera Corridor. Un diferencia grandi den ehecucion di e plan e biaha aki ta cu lo planta e matanan prome y despues lo pone e looppad.
