DOW: ‘Compania Odinsa responsabel pa gasto di 400 mil florin pa drecha kabel di coriente’

Segun director di DOW, Marlon Croes e compania Odinsa cu ta encarga cu e proyecto Green Corridor, ta esun responsabel di e gasto grandi di alrededor di 400 mil florin, ocasiona cu e kiebro di un kabel di coriente di Elmar.

Segun sr. Croes e compania tin tur informacion di e identificacion di e red di cable di coriente pero “descuido ariba trabou sa sosode”. Den e caso aki, e director di DOW a señala cu e compania Odinsa ta responsabel pa tur e gastonan cu tin envolvi den e rehabilitacion di e red aki di distribuido di coriente.

Diabierna durante un conferencia di prensa, sr. Croes a bisa cu durante e trabou cu ta tumando luga riba e proyecto Green Corridor, trahadonan na servicio di e compania Odinsa a dal un kabel di 60KV di Elmar cu mester cuminsa traha pa rehabilita e kabel aki pa asina garantisa e suministra di nan servicio di coriente.

El a destaca cu hopi lihe e compania di utilidad aki a switch over pa garantisa e suministro di coriente. Pero e no ta descarta cu e risico ta hopi grandi den caso cu den e desaroyo di e trabou di Green Corridor, nan ta bay dal otro kabel manera ya caba a yega di sosode dos biaha.

Segun sr. Croes, DOW a manda un carta pa Odinsa unda nan ta laga sa cu esaki ta e di dos biaha cu nan ta dal un waya di 60KV, nan a dal un na Mahuma y awor na altura di Young Fellow Bar & Restaurant (Barcadera). Den e carta, DOW ta pidi Odinsa riba cual ta e procedura cu nan ta bin den e compania pa garantisa cu e tipo di incidente no ta sosode mas.

Director di DOW a laga sa cu Elmar a urgi nan departamento pa para e trabou riba Green Corridor, locual DOW a papia cu e compania Odinsa te ora cu e trabou cu mester a tuma luga pa asina nan por continua cu ehecucion di e proyecto aki. Dos siman a tarda e trabou pa drecha e kabel.

Considerando cu e trabou aki tabata uno grandi y  cu a demanda presencia di expertonan di Hulanda, esaki lo tin efecto riba e proyecto cu lo sufri un tardansa. E team di DOW encarga cu e asunto aki ta pidiendo un update di schedule di e compania pa wak kico lo ta bay ta e tardansa awor. E tardansa aki por ta di un luna of mas, ya cu ainda tin diferente asunto cu mester wordo haci riba e proyecto di Green Corridor, cu a wordo para pa motibo di e incidente aki.

E accidente aki cu e kabel di coriente di 60KV a sosode un par di siman despues cu durante un conferencia di prensa riba Ser’i Teisji, representante di Odinsa, Carlos Zubieta a anuncia cu pronto lo cuminsa entrega un gran parti di e proyecto di Green Corridor. Awor prome cu nan lo bin cla, Odinsa ta bay confronta e debe aki di casi mey miyon florin pa cubri e gasto ocasiona pa e daño of kiebro di e kabel di coriente di Elmar.