Dos yiu di Bernardo Leyva lo yega Aruba pa conoce nan famia

Hopi hende di Aruba a bay afo den añanan 1920 buscando un miho porvenir. Esaki ta e caso di Bernardino Luidens, kende a bay Cuba cu su 19 aña. Despues di hopi tempo biba y a fayece na Cuba, yiunan di Bernardino lo ta na Aruba pa conoce nan famia. E famia cu ta aki na Aruba, ta feliz di e oportunidad cu nan ta haya pa conoce e famia di Bernardino.

Bernardino a bay Cuba unda cu el a traha den cortamento di caña. Segun e famia, el a bay traha na Cuba pero tabata tin e meta pa regresa Aruba. Lamentablemente e no a regresa Aruba bek pa ta cu su famia. Un di e motibonan importante pakico e no a regresa, ta cu ora el a wordo inscribi na Cuba, su nomber y fam a wordo cambia y esaki no tabata cuadra mas cu su paspoort Hulandes.

Su nomber a wordo cambia pa Bernardo mientras cu su fam a wordo cambia pa Leyva. E fam a cambia pa motibo cu e Cubanonan no por a bisa Luidens. Asina aki Bernardo su generacion a inicia na Cuba.

Bernardino Luidens (Bernardo Leyva) a nace dia 20 di mei 1901 y su mayornan tabata Francisco Luidens y Antonia Erasmus. Bernardino tabata tin 6 ruman mas esta Damasco, Fortunata, Filomena, Benita, Leoncita y Casimiro. Bernardino tabata e yiu mayor, pero mirando cu e kier a yuda su famia, el a dicidi di bay busca un miho porvenir pa su mes y pe famia. P’esey el a bay Cuba.

Bernardo tabata traha duro na Cuba y el a conoce hopi hende. Pero Rafaela Lorenza Hechavarría-Hechavarría a capta e wowonan di Bernardo. Nan a namora di otro y despues a casa. Den nan matrimonio a nace 5 yiu. E yiunan ta Aidée Leyva- Hechavarría, Andres Leyva- Hechavarría, German Dagoberto Leyva- Hechavarría, Jorge Leyva- Hechavarría y Tité Leyva- Hechavarría, kendenan a percura pa e generacion di Bernardino sigui crece na Cuba.

Despues di hopi tempo, e famia a cuminsa cu tramitenan pa Bernardo regresa Aruba. Durante e tramitenan, Bernardo a fayece dia 7 di december 1990 na e edad di 89 aña. Bernardo a biba pa 70 aña na Cuba. Algun miembro di e famia Luidens-Erasmus tabata bay Cuba pa bishita Bernardo su famia. E famia ta lamenta cu Bernardino su soño di regresa Aruba no a wordo cumpli.

Dos di e yiunan di Bernardino lo yega diahuebs atardi cu e vuelo di Copa. Nan ta feliz cu pa prome biaha nan ta bin Aruba y tin e oportunidad di conoce nan famia di Aruba. Nan ta spera cu durante nan estadia, nan por conoce hopi miembro di nan famia cu ta Luidens, Briesen, Erasmus.