Dos muhe di nacionalidad Colombiano cu ta eherce e profesion mas antiguo na mundo, cu ta prostitucion, diabierna ultimo a haci un denuncia na Consulado di Colombia contra e propietarionan di e barnan na unda nan tabata traha na San Nicolas.

Pa motibo di privacidad, e medio di comunicacion Noticia Impacto no a duna di conoce nan identidad. E trahadornan en cuestion a denuncia cu e doñonan di e bar unda nan tabata traha ta abusa di nan. “Ora nos a yega akinan, nan a bisa nos cu nos tin cu paga 200 florin y e cas, mas nada. Awor a resulta cu nos tin paga medico, nos tin cu paga adicional pa e cambernan… y ora nos a cuminsa bisa cu nos no a gusta esaki, cu esaki ta un abuso, nan a cuminsa pone problema pa nos, cu si anos no ta gusta, nan ta cuminsa kita nos e internet, TV, airco. Nan a pone nos un limite pa sali y esey nan no a bisa nos, nan a bisa cu nos tabatin libertad pa sali y pa tin situacion na diferente parti. Pero esey no ta asina”, un di nan a informa.

E otro persona a indica cu e tabatin tres dia sin traha door cu e doño di establecimento unda e tabata traha a dun’e un pasashi di avion, pa motibo cu e tabatin dos dia malo y p’esey e no por a paga pa e cas. A bis’e cu e mester bay. “El a dicidi cu mi tin cu bay pasobra mi tabatin dos dia malo y mi no por a paga e cas. El a dicidi cu mi tin cu bay sin niun peso. Aworaki mi no tin placa ni pa yega Colombia. P’esey ma dicidi di denunci’e pasobra e ta abusa hopi di nos, e ta kita nos placa di nos trabao adicional di tur loke nos tin cu pag’e tur dia. Loke nos ta traha den dia nos tin cu pag’e anochi. Tambe e ta kita nos e servicio adicional ora nos ta sali cu nos clientenan y hasta malo nos tin cu traha, e sa tur caminda unda nos ta bay”, el a bisa.

Igualmente, e ultimo persona aki a sigura cu su yiu tabata malo na Colombia y cu e no por yud’e debi na e placa cu e tin cu paga na su doño di trabao tur dia. “E no a worry cu mi yiu tabata den un hospital y ami akinan tambe tabata malo, cu mi mester a dun’e su placa tur dia. P’esey el a dicidi cu e kier deporta mi. Ami dicidi di scapa, pasobra e no tabata laga mi saca mi cosnan personal, sino cu a mi mester a bay aeropuerto cu e hendenan cu e tabata bisa. Mi no por haci nada, sino cu tur cos mi mester a papia cune.”

El a informa cu nan ta paga 110 florin pa dia mas 10 florin di cada servicio cu nan ta haci cu nan clientenan, pero si nan ta sali for di nan luga, nan mester paga 200 dollar.

E condicionnan pa biba no ta esunnan di mas miho, manera un di nan a sigura. Nan tabata laba nan paña den baño, nan tabata cushina cu dos wea. Tambe nan a declara cu “nos no ta biba bon, pero esey nos a haya sa ora nos a yega na e isla. Esey ta nos condicion di bida y nos tin e condicionnan cu segun e persona ey, cu ta duna nos trabao, ta bisa cu tin pa nos, si nos kier biba asina, bon, si no, e ta deporta nos”.

Segun un di nan a manifesta, e situacion aki ta bin pasando for di basta tempo y e no a bisa nada debi cu e doño di trabao a bis’e cu e ta e presidente di tur e barnan di e area ey y cu e muhenan mester adapta na e reglanan. “Pa motibo cu mi amiga a dicidi di no sigui traha asina, mi a dicidi di apoy’e y for di eynan problemanan a bin. E [doño di e bar] no kier entrega mi paña, ni laga saca nos cosnan, sino cu nan ta bay hiba nos na polis pa manda nos na Colombia. Esaki ta parce nos inhusto, pasobra nos ta legalmente akinan y nos ta cumpli cu nos trabao. Hasta si nos ta malo igual nos tin cu traha.”

Ademas, el a indica cu e situacion aki tambe ta afecta diferente trahadonan sexual di varios bar. “Aunke na otro barnan si ta trata nan trahadonan bon” el a bisa.

Nan a ricibi apoyo di consul Colombiano, Mirza Gnecco ken for di diabierna ultimo – segun nan a sigura – a duna respaldo na nan pa di e forma ey diasabra nan por a tuma un vuelo pa Colombia, despues di sufri abuso di nan doñonan di trabao pa un tempo di aproximadamente 15 dia, manera nan a splica den nan entrevista.