Diadomingo madruga tabatin un suceso caminda autoridad a haci un yamada na centro di alarma 911 pa necesidad di ambulance pa un accident cu emergencia, pero a haya e informacion cu no a logra comunica.
Comandante Edward De Cuba a duna un splicacion tocante e situacion, cu nan a ricibi un informe cu Polis tabatin mester di un ambulance cu urgencia pa motibo di un accident. Pero a haya e noticia cu nan no por a comunica cu alarma central.
De Cuba a bisa cu ora agente policial a bay wak e motibo cu no por a comunica, e patruya a wak cu dos centralista cu tabata na warda tabata drumi. Segun De Cuba, riba un maat y bou di clechi. Esey a pone cu departamento di bombero a cuminsa comunica cu otro pa wak kico por a pasa.
“E berdad ta cu tur dos persona tabata drumi durante ora di trabou y durante emergencia. Pa nos, esey ta inaceptabel, pa motibo cu servicio pa comunidad di Aruba ta 24/7. Ta pa demostra cu un emergencia por pasa ki ora cu ta. Di e bombero mas nobo te cu lider, tin cu ta accesibel 24 ora pa dia”, De Cuba a splica.
De Cuba ta expresa cu ta inaceptabel cu dos persona a scoge pa bay drumi durante ora di trabou y den un funcion cu ta di suma importancia, pa motibo cu nan ta e porta pa drenta pa asina haya e servicio di emergencia.
De Cuba ta splica cu un situacion asina por perhudica e trabou cu otro colega ta haciendo pa drecha imagen y servicio di cuerpo di bombero den bista di pueblo. Den combersacion cu minister di Husticia y staf, a dicidi pa duna ‘toegangontzegging inmediato pa 6 siman’.
Asina nan ta bay wak kico precisamente a pasa y pakico el a pasa. Nan no por bisa di biaha kico a pasa; sinembargo e ta bisa si cu ambos persona a tuma e decision di bay drumi. Pa laga e trabou un banda. Segun De Cuba, pa e motibo aki no por confia e personanan aki, mirando cu conscientemente a dicidi pa laga e servicio di pueblo na un banda. “Esey no ta acepta aki banda.”
A puntra De Cuba si tabatin caso grave. E ta bisa cu sa di accident di auto, unda cu polis a rekeri ambulance. Nan a purba yama, pero tabata keda cera. Pa e motibo ey a tuma decision di manda un patruya pa wak kico por a pasa. Ora cu nan a yega, nan habri e porta y ripara cu e personal tabata drumiendo.
Tabatin varios comentario y reaccion cu ta bisa cu personal ta tiki y e overtime ta pone cu e personal ta keda cansa. De Cuba a contesta cu ta berdad, nan tin falta di personal ‘basta grandi’ den e parti di subi truck tambe y den alarm central tambe tin’e.
Sinembargo, e ta bisa cu esey no ta kita afo cu como trahado tin responsabilidad di bisa cu no por traha pa motibo di overtime y ta cansa. “Nos ta acerca trahado pa overtime en berdad pa asina cubri e falta di personal.”
Pero teniendo na cuenta cu e trahado, pa mira cuanto ora e tin trahando, pa asina no pone na peliger e servicio cu nan ta duna pueblo.
Na mesun momento, De Cuba ta bisa cu pasobra un trahado tin hopi ora trahando e no por funciona optimal y por ta peligroso pa su mes, colega y pueblo.
De Cuba ta bisa cu ta keda tambe na man di e trahado pa bisa ‘no, mi no por, pasobra mi tin hopi ora trahando’ y asina lo tin consideracion cune. Nan tin cu avisa nan hefe directo pa bisa cu nan curpa no tin forsa mas, ta cansa of tin cu drum,i pero ta bisa cu no a geef aan nada na e momento.
El a splica cu tambe na e alarm central semper tin dos persona, en caso cu un di nan mester bay baño of relaha su pianan, pa bay afo, pa motibo cu ta 8 ora sinta anto esey ta cansa. Semper ta keda un hende eyden, pasobra e ta 24 ora cu mester ta pendiente. Tambe si uno ta sinti su mes cansa e por descansa un rato, pero semper tin un hende cu ta lanta pa atende cu yamada.
De Cuba a duna di conoce cu nan a reuni cu henter e departamento pa asina wak kico ta bay sucede e dianan binidero pa e proceso legal y huridico. Ta realsiando un investigacion mas profundo pa wak kico a pasa. Pero pa cualkier trahado cu tin pregunta of kier sa mas por ‘pasa libremente cerca nos’. Tambe minister di Husticia ta na altura y pendiente di feedback.
A puntra De Cuba kico lo pasa awo y pa dianan di fiesta y fin di aña. E ta bisa cu nan ta keda cu nan servicio 24 ora pa dia pa tur 365 dianan di aña, pasobra mester ta disponibel pa pueblo. “E ta bay pa siguridad y servicio cu nos tin cu brinda nos comunidad.”
