Awe durante ora di mainta RST bou orden di Ministerio Publico (OM) a haci detencion di dos persona cu ta ser considera sospechoso den e caso di ladronicia di radio di polis. E aresto a tuma luga na un cas situa den Dakota.
Tabata algun luna pasa cu varios miembro di prensa a ser deteni relaciona cu un posibel hortamento di radio di polis, pa uza esaki pa scucha comunicacion di polis y consecuemente yega na lugarnan unda asistencia di polis ta ser rekeri. Esaki segun Ministerio Publico ta algo castigabel, pa cual a inicia un investigacion. Segun vocero di Ministerio Publico, Ann Angela, a comenta na Bon Dia Aruba, e expectativa ta pa hiba e caso dilanti corte prome cu reces (na juni benidero). “Nos lo cuminsa saca e citacionnan dentro di poco”, sra. Angela a comenta.
Bon Dia Aruba a haci e pregunta cu si a logra di haya e radionan cu ta ser bisa cu a wordo horta. Sra. Angela: “Esey lo ta informacion cu ta forma parti di e investigacion. Dia di e caso, e tipo di detayenan ey di e caso, y mas, lo wordo haci publico.”
Durante su programa di noticiero na Canal 90 por a scucha Nelson “Speed” Andrade ta comenta riba e echo aki, cu entre otro e ta considera un persecusion contra di prensa. E periodista ta insisti cu ta bou instruccion di Minister Andin Bikker a inicia cu e investigacion aki. “E radio cu boso ta busca ta na warda di polis”, Andrade a expresa na radio. ArubaNative.Com di kende su manehadonan tambe ta sospechoso den e caso aki ta yama e investigacion uno di “persecusion selectivo”.
