(ScienceAlert)—Dos pashent di infarto a logra move nan man atrobe despues di un procedura experimental cu a restaura conexion zwak entre brasa, celebro y medula espinal.

Heather Rendulic ta un di e dos sobreviviente. Pa un luna stret, como parti di un estudio lidera pa investigadonan di Universidad di Pittsburgh na Merca, e por a move su man mas facil ora pulsonan electrico tabata core den su medula espinal.

Rendulic a sufri un infarto den su adolescencia, cual a lag’e paralisa na e banda robes di su curpa. Manera hopi sobreviviente di infarto, el a haya algun movemento bek, pero pronto esaki a disparce y hopi tarea diario no tabata posibel p’e.

Pa hopi aña, Rendulic a biba “cu un man den un mundo di dos man”—pero awo a mira e posibilidad pa pashent di infarto den añanan binidero si stimulacion di medula espinal wordo aproba pa ta sigur y efectivo.

“Ora e stimulacion ta cendi, mi ta sinti manera mi tin control di mi brasa y man atrobe, algo cu mi’n experencia den mas cu 9 aña,” el a bisa.

Aunke tin dos caso so reporta den e estudio, Rendulic y e otro participante ta mustrando progreso claro den nan forsa di man, movemento di brasa y destresa di man despues cu e aparato cende.

E aparato ta consisti di un par di implantenan metal electrico—flexibel manera spaghetti—cu a wordo poni den e pida ariba di e medula espinal, pa cual esaki ta conecta cu e sensornan di brasa y man.

Ora e aparato ta cendi, e electrodonan a suministra pulsonan electrico pa e circuito espinal cual a bira zwak pa via di e infarto, pero cu si a keda intacto. En bes di forsa e musculonan pa move, e pulso electrico a amplifica mensahenan den e circuito neural di e columna vertebral pa asisti movemento.

Tur dos muhe den e estudio a sufri di diferente tipo di infarto, pero tur dos a mustra mehoracion den man y brasa. Nan a ricibi e stimulacion experimental 4 ora pa dia, 5 dia den siman, dentro di un duracion di prueba clinica di 1 luna.

Den un serie di test cual a wordo graba riba video y cu sensornan sin waya cu ta detecta contraccion den e musculonan, por mira cu Rendelic por hisa su brasa, tene un canica di sopi, hinca cuminda cu forki, habri lock y pinta cierto figuranan.

E movementonan aki, combina cu e rango den mocion di brasa y schouder, tabata un reto mas grandi cu e stimulacion di movemento den pia, segun investigado. Pero, tur dos exito tabata remarcabel.

Aña pasa caba, investigadonan a reporta cu 9 hende por a cana atrobe cu asistencia despues di ricibi stimulacion di medula espinal y rehabilitacion.

Prome cu esaki, un estudio na 2016 a mustra cu stimulacion electrico kisas tambe por mehora movemento den brasa y man despues di un daño na e medula espinal. Cu mas test, investigadonan den e ultimo estudio aki ta kere cu sobrevivientenan di infarto por beneficia di esaki tambe.