Departamento di Husticia a habri cargonan ayera contra e supuesto lider y un administrador di un gang di criminal cibernetico Ruso, cual oficialnan Mericano ta bisa a desaroya y distribui malware uza pa horta mas di $100 miyon di banco y otro institucion financiero den mas di 40 pais durante ultimo decada.
Apart, Departamento diTesoreria a bis cu tabata congelando tur activo di e dos homber Ruso, hunto cu 15 otro asociado y shete organisacionnan basa na Rusia, incluyendo Evil Corp., nan supuesto grupo ‘umbrella’.
Acusa di 10 cargo den corte federal na Pittsburgh tabata e supuesto lider di Evil Corp., Maksim V. Yakubets di 32 aña di Moscu, y Igor Turashev di 38 aña di Yoshkar-Ola. E cargonan ta inclui conspiracion, hacking di computer y fraude. E dos homber no a ser aresta, y nan paradero ta desconoci.
Den un declaracion, oficialnan di Tesoreria a acusa Yakubets di recluta criminal cibernetico pa gobierno Ruso. Segun e declaracion, el a cuminsa traha pa FSB, un sucesor di e agencia di spionahe KGB, na 2017 y tabatin tarea pa traha riba proyectonan incluyendo ‘adkiri documentonan confidencial a traves di medionan cibernetico’ pa nan.
Departamento di Estado y FBI ta ofreciendo un recompensa di $5 miyon pa informacion cu conduci na aresto y condena di Yakubets. Oficialnan ta bisa cu esey ta e recompensa di mas grandi cu a yega di ofrece pa un acusado di crimen cibernetico.
Fiscalnan ta bisa cu e acusacion entrega ayera ta vincula cu creacion di e malware ‘Bugat’ (tambe conoci como ‘Dridex’ y ‘Kridex’) cu ta automatisa e hortamento di credencial uza pa log in den banco y otro institucionnan financiero. Tipicamente tabata duna esaki a traves di email di phishing cu a gaña usuarionan pa duna nan informacion personal den website falso di banco, segun investigadonan. E ladronan online lo haci retironan no autorisa.
Yakubets, kende tabata uza e apodo online ‘aqua’, y Turashev ta acusa di ataca dos banco, un districto escolar y cuatro compania na Pennsylvania – un negoshi di petroleo, compania di material di construccion, compania di tecnologia di vacuum y thin film deposition y fabricante di metal – como tambe un fabricante di arma.
Yakubets tambe ta acusa den un caso separa na Nebraska, di supuestamente conspira pa comete fraude di banco en conexion cu otro malware, segun autoridad.
Yakubets y su co- conspiradonan ta acusa di victimisa 21 municipalidad specifico, banco, companianan y organisacionnan sin fin di lucro na California, Illinois, Iowa, Kentuckuy, Maine, Massachusetts, New Mexico, North Carolina, Ohio, Texas y Washington.
E caso aki no ta e prome involucrando un ring di racketeering cibernetico. Dos co- conspirado di Yakubets, ambos nacionalidad Ucraniano, a ser extradita despues di nan acusacion na 2014, y a declara nan mes culpabel di conspiracion, segun investigadonan.
