Dos preso a muri y como trinta a huy for di un prizon situa na Sao Luis, estado di Maranhao, noreste di Brasil, despues di un explosion na un muraya di e prizon aki, fuente oficial a informa. E suceso a tuma lugar diadomingo anochi ora cu un di e murayanan di e centro di detencion provisional di Pedrinhas a explota pafo di prizon. Via e buraco cu e explosion a laga den e muraya mas di 30 prizonero a huy.
Te na e momento aki nan a logra re-captura 6 preso solamente, segun comunicado cu Secretaria di Administracion Penitenciaria regional a publica. Na momento di huida e grupo special di operacion penitenciario a drenta den accion y a ocasiona e fayecimento di dos preso cu a haya tiro di arma di candela.
“Despues di un intercambio di tiro entre bandido y agente penitenciario di Grupo Special di Operacion Penitenciario, dos preso a muri, un di nan na e local y otro den hospital” comunicado a informa. Polis a habri un investigacion pa asina identifica sospechosonan cu a participa como complice den e huida for di e centro penitenciario. Den e suceso ningun hende a duna cuenta di e prome preparativonan pa e huida.
E unidad di prizon ta e unico unidad masculino di compleho penitenciario di Sao Luis, cu no tin ainda un porta unico ni tampoco un inspeccion via scanner. Na aña 2015 un delegacion di Nacionnan Uni a bishita e instalacion di e centro pa asina verifica hopi denuncia cu nan a haya for di organisacion social, encuanto violacion di derecho humano den e prizon aki.
E suceso ta indica un caos mas, hunto cu otro situacion cu Brasil ta bibando awor den su sistema di prizon. Brasil tin e grado mas halto di hacinamento hunto cu pesimo condicion den prizon, pasobra tin 654.372 persona den prizon di Brasil, loke ta significa como 76% mas cu nan capacidad normal, dato oficial ta bisa.
Brasil ta bibando un di nan pio crisis den prizon na cuminsamento di aña 2017, despues cu na varios prizon di estado di Amazona, Roraima y Río Grande do Norte, a registra hopi crimen entre prizonero di diferente banda di criminal, situacion cu a laga cerca di 150 morto.
