Dos polis envolvi den e morto di Mitch Henriquez na 2015 tabata dilanti hues ayera sin cu por a mira nan. E punto di disputa di mas grandi durante di e sesion preparatorio tabata di duna e datonan personal di e sospechosonan na e abogadonan di e famianan di e defunto. Hues ta haya cu e privacidad di e sospechosonan ta mas importante. Esaki nos partner den noticia, Ret Karibense ta reporta for di Hulanda.
E dos sospechosonan, bisti na uniform di polis, tabata sinta tras di un pantaya. Ta corte so por mira nan. Ta menciona nan nomber como DH01 y DH02. A cambia nan bos y p’esey ta dificil pa tende kico nan ta bisa. Tambe e abogadonan di e famianan di e defunto, Gerald Roethof y Richard Korver, no sa e nombernan di e sospechosonan.
Menasa
Segun hues ta menasa e dos polisnan seriamente, mescos cu e tres otro polisnan cu no a persigui den e caso aki. Pero e privacidad aki, cu segun abogado Roethof hasta sospechoso di teror y di asesinato no ta haya, ta cay malo cerca e famianan di e defunto. Tin kikmento riba tribuna publico. Abogado Korver: “E menasanan ta di aña pasa. Mi ta puntra mi mes con actual e menasa ta awor.” Durante di e sesion e ta añadi cu supuestamente e tin informacion tocante un di e sospechosonan, pero cu e no por verifica esaki awor.
Famia ta prefera di warda
E trato di contenido di e caso ta cuminsa 6 di april. A reserva cinco dia den corte. E famianan di Mitch Henriquez a prefera di wanta e caso pasobra ainda tin un procedura ta core pa forsa persecucion di e tres otro polis (DH03 te cu DH05). Hues ta pensa cu esaki lo tarda e caso cu un aña y ta p’esey e no ta wanta e caso mas.
Sr. Henriquez di 42 aña a fayece den zomer di 2015 di violencia di polis den Zuiderpark na Den Haag. Dos di e cinco polisnan envolvi den su detencion ta dilanti hues pa maltrato severo cu morto como consciencia.
