Dos homber a muri na Argentina pa motibo di un ola di friu cu henter Argentina ta pasando aden desde dialuna ultimo. Diadomingo e ola di friu a laga hopi vuelo cancela, pa destino turistico manera Bariloche, riba dianan cu ta considera comienzo di vacacion di invierno di 2017. Un homber di 50 aña cu tabata bibando riba caya a ser haya sin bida, den centro di Mar de Plata (400 kilometer na sur di Buenos Aires) y otro di 41 aña a muri tambe pa hipotermia den su cas den estado precario na Rafaela (540 km noroeste), polis a informa.
E caida di sneeuw a laga algun poblacion sin energia electrico, y algun caminda y caretera kibra na zona di Cordiyera Patagonico. Autoridad a cera aeropuerto di Bariloche y Chapelco. Hopi turista en especial for di Brasil a keda pega durante henter fin di siman cu a pasa, den dos importante centro di ski, pa motibo di hopi sneeuw cu a dificulta nan salida di e lugarnan ey.
Otro grupo di turista a keda cu nan ticket di avion na man na Buenos Aires, pasobra hopi vuelo no a sali of tabata hopi laat cu varios ora di retraso. Aeropuerto di Bariloche a keda operativo diadomingo despues di mey anochi, pero un avion priva a sali for di pista di aterisahe cuatro ora mas laat, y autoridad a dicidi pa cera di nobo, e concesionario Aeropuertos Argentina 2000 a informa. Awor vuelonan ainda tin hopi retraso.
