Informacion di Departamento di Salubridad Publico DVG ta indica cu mas persona ta sigui fayece cu Covid-19. Ayera a registra dos morto mas, cu loke e cantidad total di fayecido cu Covid-19 a aumenta na 153.
DVG a duna tambe su resumen diario pa ayera, den cual a informa cu 43 persona a recupera di e malesa causa pa e virus SARS-CoV-2. Tambe a registra un total di 42 caso nobo di Covid-19, di cual dos no ta residente y 40 ta residente. E cifranan aki ta representa un tasa di positividad entre nos residentenan di 18 porciento.
E cantidad di casonan activo pa ayera tabata 477.
Datonan di DVG ta ilustra casonan nobo di Covid cu un averahe semanal di 42 caso pa dia y un averahe di tasa di positividad semanal di 20 porciento pa dia.
Actualmente tin 36 persona hospitalisa na Aruba debi na Covid, di cual 10 ta den Unidad di Cuido Intensivo ICU y 26 ta riba piso general. Ademas tin na Colombia 24 pashent di Aruba hospitalisa den ICU.
Datonan
For di comienso di juli cu e variante Delta a haci su introduccion na Aruba, DVG por a observa cu lamentablemente 45 persona a perde e bataya contra e virus SARS-CoV-2, di cual 7 persona tabata vacuna y 38 no tabata vacuna.
Riba e graficonan di DVG por observa e cantidad di fayecido y nan respectivo edad na momento di nan morto desde comienso di juli 2021.
Infertilidad
Mientras tanto, campaña di vacunacion di DVG ta enfoca tambe riba duna tur informacion oficial riba e vacuna contra Covid-19. Den un post riba nan pagina di Facebook, DVG a aclaria e rumornan cu ta circula, principalmente riba rednan social, cu e vacuna contra Covid-19 ta causa infertilidad.
“E contesta ta NO. Tanto hende homber como hende muhe por vacuna nan mes sin pensa riba efectonan directo of secundario ariba nan fertilidad. No tin niun componente den e vacunanan mRNA contra COVID-19 cu ta afecta fertilidad di ser humano of su desaroyo hormonal/sexual”, DVG a declara. “Tampoco ta existi un mecanismo fisiopatologico pa e vacuna logra interactua cu e organonan reproductivo of cu eicel/spermacel.”
Finalmente, DVG a haci un yamado pa tur persona cu ainda no a vacuna participa den e VacunaTHON e fni di siman aki. “Corda cu vacuna no ta solamente un acto di solidaridad y responsabilidad conhunto caminda niun hende por keda atras; pero mas tanto, vacuna ta un acto di amor pa bo mes, bo famia y bo pais!”
