Den bon coordinacion cu otro departamentonan a logra rescata tres persona. Dos persona nan curpa tambe a ser saca for di costa. Alabes autoridad ta haya basta purun di droga y tur a wordo confisca.
Tabata ayera mainta pa 08:15am cu personal di Fundacion Parke Nacional Aruba a bati alarma na Central di Polis cu un hende homber cu ta papia Spaño a yega na un trahado di nan, bisando cu madruga el a drenta Aruba ilegalmente y cu dos di su compañeronan ta mal pega bao baranca.
Mesora Central di Polis a cuminsa manda patruya, brandweer, personal di kustwacht y ambulance na e sitio. Na e sitio en berdad patruya ta informa cu nan ta wak dos hende homber bao di e baranca, pero cu e situacion di e lama ta hopi malo y dificil pa nan mes rescata nan. Personal di helicopter di Cuerpo Policial a logra maniobra y saca e dos homber aki. Mesora e personal di helicopter a sigui busca y un poco mas panort ta wak 2 curpa sin bida ta drief y basta purun preto.
Pa e helicopter di polis tabata practicamente imposibel pa saca nan. Mesora personal di bombero den bon coordinacion ta logra baha y saca e dos curpa sin bida plus e purun cu probablemente tin droga aden. Por bisa den un bon coordinacion a usa tambe e helicopter di Kustwacht pa keda monitor e situacion for di lama.
Personal di ambulance a trata e tres persona y despues di tratamento a detene y hiba nan warda pendiente mas investigacion. Tambe a confisca e purunnan y lo habri nan pa haci e testnan necesario pa wak ki sorto di droga tin den nan. Cuerpo Policial ta manda palabra di profundo condolencia na famia di e fayecido.
