Dos pashent cu a haya tratamento di un medicina nobo na ciudad di Goma, ta declara cura y por a bay bek nan cas, segun dokter ta informa.
Dokter cu ta luchando contra ebola, mesora a manda e mensahe cu persona por recupera di un malesa mortal si nan busca yudansa apropia. Ebola ta keda peligroso, pero e ta curabel cu e tratamento corecto, asina a informa dr. Jean- Jacques Muyembe, Director di Instituto Nacional pa Investigacion Biomedico.
“Ebola ta mata lihe, pero ta cura lihe, esey ta e mensahe. A detecta e casonan aki lihe, e esposo tabata infecta, despues a pega su esposa y yiu. E team a detecta e caso, nan a trece e famia na e centro di tratamento. Nos a duna nan e tratamento cu ta efectivo y den un tempo cortico nan a cura”, Muyembe a splica.
Muyembe a bisa cu dos droga ta loke nan ta uzando actualmente pa e tratamento. Pa motibo di e resultado di un studio cu a tene den laboratorio, ta mustra cu e dos droga ta efectivo. Sinembargo, investigadonan ta bisa cu mester haci mas estudio pa wak con ambos componente ta traha. E droga ta ‘anticurpa’ cu ta blokia ebola.
Esperance Nabintu hunto cu su yiu ta contento cu nan a sobrevivi ebola. “Danki na Dios, ami cu mi yiu tabata malo y Dios a cura nos. Sin duda, hende mester kere cu e malesa ta existi”, Nabintu a bisa. No a detecta otro morto di ebola for di e tempo ey.
Cu e caso aki, e team medico a compaña e pashent na e area, unda cu nan ta educando residente con pa trata ebola apropiadamente. Tin menos peliger cu ebola lo sigui plama den Goma.
