E tabata un dia hopi largo, unda cu 12 partido politico interesa pa participa den eleccion parlamentario di 25 di juni, 2021 a entrega nan lista di candidato.
Loke ta resaltante e biaha’ki ta solamente dos partido politico, e dosnan mas grandi, ta esunnan cu a logra entrega un lista cu 29 candidato. E otronan a entrega lista cu bou di 20 y hasta menos cu 10 nomber. PPA (17); UPP (13); PPP (12); RED (13); Raiz (12); POR (16); MAS (7); HTC (6); Accion21 (14) y CURPA no a duna prensa copia di su lista.
E dia mes a bay hopi trankil y practicamente tur partido a yega na tempo, cu excepcion di Partido Pueblo Prome di Michael Williams cu a hay’e den un retraso chikito. Tabatin basta bon cooperacion cu polis. Raiz cu a entrega su lista digitalmente, toch a dicidi di acudi personalmente pa haci esaki.
Awo ta bay cuminsa e siguiente proceso unda cu e partidonan cu no tin representacion den Parlamento lo mester haya 587 firma pa por participa den e eleccion, cu ta 8 partido. Ainda por sosode cu tin partido lo por uni of apoya otro den e proceso electoral aki. Por firma pa e partidonan na trece diferente sitio cu ta bay wordo anuncia den un aviso di gobierno.
