Dos opcion di coalicion… Y ningun ta satisface…?

Cu dos opcion pa forma un gabinete di coalicion nobo no ta nada straño pa scucha varios version cu ta inidica cu negociacion por bay den ambos direccion. Por ehemplo, e reciente biahe di vacacion di actual promer ministro demisionario ta ser interpreta como un señal cu e acuerdo cu e partido cu e supuesto ‘yabi’ ta haci caba y cu e negociacion cu e otro partido, y promer candidato segun resultado electoral, lo ta un mero formalidad. Si acaso esey ta asina, ainda ta keda e tarea pa no laga esey mustra asina; e fiesta den pura di biaha pasa cu partido Raiz lo ta fresco den memoria di hopi di nos.

Pero tin mas consideracion. Mirando mas leu den futuro, lo ta sensato pa partido Futuro no pensa riba futuro y mara nan mes na e partido cu tin casi 8 aña ta goberna y cu den e proximo añanan lo duna mas tanto ‘mas di mesun cos’? Salvo algun cambio, ta e mesun caranan nos lo mira di regreso den tal gabinete nobo. Lo ta sorprendente si nan de repente ta bin cu otro idea y plan cu loke nos a mira caba? Despus di a logra efectua kico den dos periodo di gobernacion?

Ta importante tambe evalua e asunto di e otro banda. Si un coalicion cu e partido democrata cristian ta bira opcion, por tin obstaculo real riba caminda. E lider di e partido menor den e potencial gabinete nobo a sali recientemente di net e partido ey, meymey di gran turbulencia tocante integridad, o mejor dicho e falta di tal, corupcion y con e partido ta maneha corupcion grandi bao di su miembronan prominente. Despues di salidaa di e dos parlamentarionan, nada no a cambia y ningun dia siquiera e partido a mustra cu den futuro lo tin un biento nobo, cu menos y preferiblemente ningun tolerancia pa corupcion. Con mester interpreta entrada di yiu di e ex-parlamentario y ex-ministro encarga cu infrastructura y stranheria na su lugar, como señal di continuacion di e ehemplo cu a haya na cas, sea den parlamento o como ministro? E situacion aki por causa interogante serio pa e partido nobo den su promer actuacion como gobernante, faltando e señalnan necesario di cambio di conducta.

Di otro banda lo mustra inmediatamente, y no sin razon, cu e contrincante grandi cu ta saliendo di gobernacion tin igual problema di credibilidad ora ta trata di integridad, mirando nan contribucion na e probable record mundial di ministro persigui penalmente cu Aruba tristemente ta mantene actualmente. E expresion scucha cu ‘cada ken cu haci malo mester sinta riba nan blaar’ ta sona bunita pero no ta tapa e realidad cu te awe practicamente nada a sucede pa preveni, den e procesonan administrativo, cu e tipo di corupcion aki ta keda bolbe, anto na nivel di ministro y director. E ultimo suceso, unda e directora di Infrastructura, cu e promer ministro saliente a caba di pone na cabez di e departamento, a resulta obheto di investigacion penal pa corupcion, ta parce nos un señal cu den e circulonan mas halto di gobernacion nan tin un concepto totalmente quiboca di kico ‘continuacion di gobernacion’ ta significa. No mester splicacion cu esaki ta keda tin un efecto devastador riba e confianza cu e ciudadano mester por tin den gobernacion. Por lo tanto hopi hende por pensa cu, cualkier partido grandi cu drenta gobierno proximamente, esey ta ‘tal para cual’.

Esey ta haci cu escogencia sensato di e partido nobo lo mester ta basa riba otro coincidencia o contradiccion den e diferente plannan pa gobernacion. Un asunto interesante, pero sin mucho perspectiva optimista, ta e tereno di cambio pa energia renovable. Realisticamente mira, nos por descarta cualkier avance den suministro di gas natural y hidrogeno, y por lo tanto tambe cualkier industria basa riba esakinan. Ta keda e posibilidadnan pa amplia energia renovable, manera energia solar y di biento. Manera tabata nos comentario na varios ocasion, nos a bay atras den ultimo añanan y no tabatin ningun avance reciente. Te awe ta parce cu nos gobiernonan no kier comprende cu sin intervencion fuerte di gobernacion, practicamente nada lo sucede, pasobra si gobierno no ta scoge pa lidera, cu incentivo y apoyo financiero, nan lo cana stroba so envez di habri caminda pa iniciativa priva, limitando e posibilidadnan pa produccion na vivienda y empresa. Si no ta cambia e rumbo drasticamente, nos ta sigui bay den direccion di e famoso aña 2030 como punto importante di evaluacion pa e igualmente famoso metanan di desayo sostenible, sin cu tin cualkier avance ta soma na horizonte.

Tin otro asunto na cual nos lo presta mas atencion den e tempo venidero, pero aki en corto e lineanan general. Ta trata di e aspecto social di nos desaroyo socio-economico. Por bisa cu desaroyo puramente economico tin poco sentido si e beneficionan social no ta yega cerca esnan den necesidad di tal. Loke nos ta mira nos dilanti ta un crecemento cu ta hiba nos na un comunidad y economia na mayor escala, di 100.000 pa 140.000 habitante, pero cu e mesun 70% cu, por ehemplo, no por fia pa financia nan propio vivienda, y gobierno(nan) tin añanan ta core pa e responsabilidad di percura pa vivienda popular y no ta pone e ciudadano central. Si nos ta sigui insisti den alaba nos desaroyo economico a base di turismo di masa, nos ta poniendo e fundeshi pa e collapse economico y social di mañan; y nos ta den e marduga di e mañan ey caba…