Segun resumen diario di Departamento di Salubridad Publico DVG relaciona cu e pandemia di Covid-19 na Aruba, e cantidad di fayecido pa e malesa causa pa e virus SARS-CoV-2 a aumenta na 73.
DVG a registra dos morto – un residente y un no-residente – pa Covid-19 den weekend, pa loke e cantidad di fayecido den luna di februari a bira 14. Palabra di condolencia na e famia y sernan keri di e fayecidonan.
Ademas, DVG a informa cu 32 persona a recupera di e malesa. Tambe a registra 15 cas nobo di Covid-19, di cual 7 no ta residente. E cifra di no-residente positivo ta encera esunnan no-residente cu ta test na aeropuerto na nan yegada y na laboratorionan prome cu nan bandona Aruba. E cantidad total di testnan ehecuta ayera na e diferente localidadnan na Aruba, entre otro laboratorio di hospital, laboratorionan priva y aeropuerto ta 516 test. ‘Postivity rate’ entre nos residentenan ta 22%.
Casonan activo pa ayera a keda ta 223.
Mientras tanto, Hospital Dr. Horacio Oduber a informa cu e cantidad di persona interna pa ricibi cuido pa complicacion di Covid-19 ta 29. Di esakinan, 7 ta den Unidad di Cuido Intensivo, mientras cu 22 ta isola riba unidad general di covid.
Edad promedio di esunnan ingresa pa extra cuido ta 63 aña.
