(AP) — Un candela na e isla Griego di Rhodes pa un di cinco dia a forsa autoridadnan pa duna orden pa evacua cuatro sitio, incluyendo dos resort banda di lama.
Como 2mil persona incluyendo turista a keda evacua via lama, segun vocero di departamento di bombero, Yannis Atropios a bisa diasabra nochi. El a agrega cu e hotelnan y casnan di huur cu a evacua “ta representa menos cu 10% di e acomodacion turistico di e isla.” El a agrega cu a evacua tur bishitante sin incidente.
Tres barco di wardacosta, un barco salbabida di ehercito, un nave inflable di forsanan special y 30 boto priva a yuda cu e evacuacion. Compania di transporte di pasahero priva, Blue Star a ofrece un di su barconan pa acomoda e evacuadonan, segun Artopios.
Den dianan anterior, e candela tabata confina na e centro montañoso di e isla, pero cu ayudo di biento, temperaturanan hopi halto y condicionnan di secura, el a plama diasabra den direccion di e costa riba e banda oriental di e isla. Medionan di comunicacion local a reporta cu e candela a alcansa tres hotel, aunke ya e huespednan tabata evacua.
