Marla Thiel-Dominguez y Luigi Petrocchi di Cruz Cora Aruba riba e barco ‘de Holland’ cu cien miembro di Marina Real pa duna asistencia humanitario na Haiti.
Mas cu 800 hende a muri na e pais ki despues cu horcan Matthew a pasa. Y mas cu 1 miyon hende a sufri y mester di ayudo. For di Corsou tambe tin ayudo unda e bapor ‘de Pelikaan’ a sali rumbo pa Haiti cu comestibel, awa y loke mester pa brinda cuido medico y cuido humanitario, asina un relato di gobierno di Aruba ta informa.
Prome minister Mike Eman tabata presente momento di e salida di ‘de Holland’. Esaki ta informacion for di e relato di gobierno:
Eman a bisa cu su presencia eynan na e pier ta tambe pasobra como Prome Minister e ta encarga cu aspectonan di Defensa y encarga cu Marina Real na Aruba. “Den casonan di ayudo internacional logicamente nos ta hunga un rol evidente. Na e momentonan aki ainda nos ta wardando riba permiso di Den Haag pa por cuminsa cu e mision. Pa no perde tempo, a cuminsa caba cu tur preparacion. E bapor de Holland ta full ekipa pa e mision aki y hunto cu nan ta bay dos miembro di Cruz Cora cu voluntariamente ta bay yuda. Nos ta masha orguyoso di nan.
Nan ta Marla Thiel-Dominguez y Andre Petrocchi. Marla a bay Haiti 4 biaha caba durante momentonan sumamente dificil pa Haiti. Dos bes tempo di e teremoto y dos bes riba misionnan internacional. E experiencia di Marla por yuda e otronan den asistencia cu por tin un contribucion importante den un situacion sumamente penoso cu tin na Haiti na e momentonan aki.”
Prome Minister Eman cu tin un relacion special cu Haiti ta bisa cu e situacion ta grave. “Haiti ta un pais caba cu hopi reto cu situacionnan dificil, awor ta haya un situacion adicional cu naturalmente ta haci cu nos como mundo tin cu responde pa yuda. Nos semper ta biba hopi di cerca cu e situacion na Haiti. Despues di e temblor nos di Aruba a traha dos scol eynan y semper nos ta keda purba pa duna un contribucion humano na e pais aki.” Eman a desea Marla y Andre hopi exito, sabiduria y siguridad riba nan mision mescos tambe esnan di Marina Real. E ta bisa cu e ta imagina su mes cu e ta bay ta un trabou dificil si mira e imagennan riba pantaya di television y otro medionan social.”
