Te ainda gobierno di Aruba no a tende nada oficial tocante e fecha 18 di october cu Secretario di Estado, Raymond Knops a duna conoce na prensa Hulandes, como deadline pa pais Aruba presenta algo concreto riba e ley di supervision financiero nobo, LAft.

Pero di otro banda, Parlamento di Aruba a yama nos Prome Minister, Evelyn Wever-Croes pa bin un reunion y duna mas informacion riba su decision di no laga Gobernador ratifica e ley nobo di LAft cu e cambionan cu nan a introduci den dje.

E ta wardando con e reunion aki lo bay den Parlamento pa asina sigui atende paso pa paso, no solamente cu e ley di LAft y e menasa cu lo por tin cu un KoninklijkeBesluit (KB). Pero tambe gobierno mester atende cu e otro menasa di un KB a base di e proposicion cu e organo di supervision financiero CAft a haci pa conseho di minister di Reino duna un ‘aanwijzing’ (instruccion) pa pais Aruba.

A pesar di e dos menasa di KB aki riba pais Aruba, e prome mandatario ta considera importante pa nos comunidad por keda mas calmo cu ta posibel, y cabes mas friu cu ta posibel, pa atende cu e retonan pareu aki.

Deadline.
Wever-Croes a bisa cu el a tuma nota di e declaracion cu Knops a duna e mesun diabierna 20 di september pero tardecito, pero te dia di awe e no a tende nada oficial di e fecha menciona di 18 di october awor.

Minister Plenipotenciario na Den Haag cu tabata den e reunion di Conseho di Minister di Reino a informa nos Prome Minister di Aruba cu no tabatin niun palabracion di un deadline nobo. E prome mandatario no ta descarta cu Hulanda lo por pone semper un deadline nobo via un comunicacion oficial of via telefon, pero te ainda esaki no a sosode.

Loke si e por bisa riba e ley di LAft ta cu gobierno di Aruba a yega di informa Parlamento cu nan a tuma e decision cu no ta bay pidi Gobernador pa ratifica e ley cu e organo legislativo a aproba introduciendo cambionan den dje. E ta kere cu pa medio di e decision aki e trayectoria di e ley aki ta finalisa. Como Prome Minister di pais Aruba, el a pidi Parlamento nan comprension. Pero Parlamento a pidi nos Prome Minister pa duna su splicacion den un reunion e siman aki.

Despues cu Parlamento a bin cu cambio den e ley di LAft den juni, Hulanda a notifica y te hasta Secretario di Estado a pone por escrito pa medio di un carta e luna aki, cu si gobierno no ta hala aden e cambionan cu parlamento a haci, nan ta retira e organo di supervision CAft inmediatamente.

Den e momento aki no ta cumbini Aruba pa CAft lo wordo retira inmediatamente, ya cu nos mester di supervision, y ainda nos propio organo di supervision no t’ey ainda pa nos por reemplas’e, segun premier Wever-Croes. E ta haya cu pa interes general di Aruba ta bon pa no haci e cambionan, manera Parlamento a dicidi.