Den e proximo dianan, si tur cos bay bon, gobierno ya ta otorga un tereno na San Nicolas na un grupo di inversionista pa construi un hotel. Tambe tin un otro cadena di hotel internacional cu plannan pa un otro hotel na San Nicolas.
Esaki ta locual minister Benny Sevinger di Infrastructura a informa na e medio 24ora.com, publica ayera. Segun e, ambos partido ta na haltura cu e refineria lo habri y no ta mira esaki como un problema.
Despues cu e proyecto di un hotel di all-inclusive di Bahia Principe na Baby Beach, San Nicolas, a cancela pa motibo di e reapertura di refineria, no a tende nada mas di proyectonan di hotel nobo pariba di brug. Te awor cu e anuncio di minister Sevinger cu aparentemente un di e proyectonan ta asina leu caba cu lo ta den fase pa pasa tereno over. Ki grupo cu cua hotel y con grandi esaki ta, e no ta divulga. E minister si ta bisa cu un di e terenonan destina, ta esun dilanti Baby Beach, riba e barancanan. Esaki tambe tabata e luga caminda tabata planea e hotel di Biaha cual finalmente no a bay door. Segun e mandatario e beachnan eybanda ta keda publico pero si lo bin desaroyonan y camindanan nobo.
Bon Dia Aruba lo haci su best e siman aki pa busca mas informacion y tambe ken ta tras di e dos proyectonan di hotel.
