Unit Narcotica ta sigui hopi activo riba caya pa loke ta trata bendemento di droga rond di e isla na unda e biaha aki mediante un comunicado di prensa Cuerpo di Polis a informa cu dianan pasa nan a detene dos hende homber relaciona cu un caso grandi di droga den area turistico.
Unit Narcotica hunto cu personalnan di Douane ta bin trahando estrechamente cu otro pa algun siman riba un caso grandi di bendemento di droga na turista den e areanan di hotel.
Recientemente a haci diferente detencion, unda un turista a ser deteni biniendo for di New York siman pas, akinan ta trata di e homber cu inicialnan P.J.G. di nacionalidad Mericano di 43 aña di edad. E team investigativo tabatin indicacion fuerte cu ta trata di un banda criminal trahando hunto for di diferente pais.
Investigacion a sigui y Unit Narcotica a haci otro detencion diasabra marduga y ta detene e homber di inicialnan F.S.G.G. di 41 aña di edad naci na Jamaica.
Durante e detencionnan a haya un cantidad grandi di droga y Cuerpo di Polis a bisa cu nan no ta descarta cu por tin mas detencion na caminda.
Augustus y september ultimo nan tambe a informa tocante otro personanan cu a ser deteni na diferente cas di Aruba na unda delincuentenan tabata bendiendo droga, un di nan a ser haya na Bubali unda nan a haya un cantidad grandi di droga y placa cu a ser confisca.
Na augustus ultimo Unit di Narcortica a ser crea pa investiga tur loke ta bendemento di droga for di casnan, ariba caya, delivery, plataforma social y hasta area di hotelnan. Tambe e unidad ta investiga tur droga cu ta intercepta pa Aduana, US Customs na aeropuerto, door di ambtenaarnan di KIA tambe tur droga encontra durante cualkier control policial. Unit Narcotica ta resorta directamente bao di Commisario di Algemene Dienst.
