TILBURG – Polis di e ciudad di Tilburg na Hulanda a aresta dos homber cu tabata parti flyer na e asina yama casnan di studiante, promoviendo benta di droga.
Tabata na cuminsamento di e aña aki dos homber, un di 26 y otro di 27, a haya e idea pa promociona benta di droga na casnan di studiante den cercania di Universidad di Tilburg. Riba e flyer tabata tin un lista di kico tur nan ta bende y cu nan prijs poni acerca. Hunto cu ne nan a pone un number di telefon for di cual por a haci pedido via mensahe di texto (sms) y cu un frase: “Nos ta deliver na Tilburg y cercania”.
Via e number di telefon, polis a haci investigacion di cual a conduci na un entrada hudicial na cas di un di e sospechosonan. Eynan a bin encontra diferente tipo di droga fuerte (harddrugs). Consecuentemente a aresta e dos hombernan como tambe a detene dos otro persona cu tabata cumpra droga cerca e dos hombernan aki.
Potretnan ta di e fuente nos.nl
