No tin ningun tipo di transparencia riba motibo ni e suma envolvi ya cu ta trata di compania priva
Dos ehecutivo di WEB a haya un areglo financiero suficiente atractivo pa nan bandona nan posicion y ningun por splica kico tabata motibo cu Director Luis Oduber y CFO, esta Chief Financial Officer Randolph Ruiz mester a bay. Ni tampoco cuanto ambos a haya como nan ‘golden handshake.’
David Kock
David Kock a representa CFO Randolph Ruiz y a splica cu cierto momento Directiva di WEB tabata kier pa termina e relacion di trabao cu ambos Ruiz y entretanto ex Director di WEB Luis Oduber. Pa tal motibo a yama un reunion di accionista pa Juli, pero cu mester a keda posponi pa ayera mainta pa motibo cu ambos tabata cu vakantie. “Den nos opinion, no tabatin motibo pa retiro y nos lo a resisti contra esey. Pero a bin un acercamento y negociacion cu net prome cu e reunion. A bin un oferta cu mi cliente no por a rechasa y asina a bin un areglo, unda partidonan a yega na un acuerdo pa terminacion.”
Kock mes no por a splica kico a conduci na e situacion aki. E mes no tabata envolvi te ora cu a bin e conflicto cu a desemboca den e ‘golden handshake.’
“Ami a keda envolvi na comienzo di luna pasa,” Kock a bisa. E abogado a afirma riba e pregunta si esaki a sosode despues di e blackout grandi. “Tabatin varios asunto den opinion di WEB cu no tabata bon. Pero mester puntra WEB pasobra parti di e acuerdo cu a cera cu mi cliente ta un obligacion di secresia, cu ta parti di e pakete.” Den otro palabra, no por papia di nada di locual tabata e disputa ni kico por a conduci kico tur por a conduci na e kiebro den confianza. WEB tambe ta mara na e mesun palabracion. “WEB tampoco por duna comentario riba e problema mas. Ningun di e dos partidonan por papia di otro na forma negativo ni duna ningun comentario.
E acuerdo cu a yega na dje tabata basa riba negociacion di abogadonan di WEB y di Ruiz. Segun mr. Kock, WEB y Utilities den e caso aki ta e mesun partido, pasobra Utilities ta doño di 100 porciento di accionnan di e planta di produccion di awa y coriente.
Chris Lejuez
E negociacion pa terminacion di relacion di trabao entre Ruiz y WEB a dura mas largo cu tabata e caso di Sr. Oduber. Abogado di Luis Oduber, mr. Chris Lejuez a splica cu e mes a keda envolvi te na ultimo y cu ta e, como representante di Oduber a negocia e terminacion di labor. Hunto cu mr. Anthony Ruiz, cu a representa Directiva di WEB y Utilites a logra yega na un acuerdo mutuo riba Diahuebs y a firma e acuerdo Diabierna pasa. “E acuerdo ta djis bisa cu e partidonan a dicidi di bay for di otro. No tin nada di argumentacion pakico a yega na e decision aki. Tabatin corespondencia si entre ami cu ta representante legal di Luis Oduber y e compania.”
Segun mr. Lejuez, ora yega na e punto cu ta dicidi cu ta bay for di otro, locual ta negocia ta e condicionnan bao cua ta kibra e relacion di trabao. Utilities Aruba a yama un asamblea di accionista di WEB pa Dialuna mainta unda a invita Luis Oduber pa ta presente. Pero como cu mientrastanto, el a yega na e acuerdo di retiro, no tabatin sentido pa bay e reunion mas.
Pregunta ta keda si ki tempo Luis Oduber a dicidi cu e ta bay acepta pa bay for di WEB. Aunke Lejuez no por a duna detaye, el a bisa cu e combersacionnan riba e forma con lo bay, a cuminza for di un siman prome. “Tabata discuti kico tabata e miho pasonan. Esta si ta bay confronta otro, y ta durante e intercambionan ey, a bira cla cu e tabata aceptabel pa Oduber yega na un areglo. Y tabata depende na ki tipo di areglo por yega y asina e combersacion a cuminza riba e condicionnan. Y esey a termina Diahuebs, ora cu partidonan a yega na un punto cu tur por biba cu locual a palabra y pa Diabierna a firma a acuerdo.”
Chris Lejuez a bisa cu su cliente, Sr. Oduber ta contento cu e pakete cu el a ricibi. “Ta yega na un momento cu mester tuma decision kico ta bay haci. Sea ta bay guera, y laga Huez dicidi, of ta laga e decision den bo mesun man y hunto cu e contrapartido yega na un solucion ‘amicable,’” Lejuez a ilustra.
Aunke cu Lejuez no a bay den detaye di e motibo cu tabata kier a kibra relacion cu Luis Oduber, el a mustra si cu ta trata di un desaroyo cu no a cuminza awor. “Ta hopi cos ta pasa prome cu yega na un punto. Mi sa si cu den tur caso, mescos cu den caso di Sr. Oduber mes, cu e ta dicidi cu te aki e ta yega den e relacion cu WEB. Den caso di Oduber e por a tuma mas tempo, pero posiblemente ta tur dos partido a realisa cu tempo cu e unico direccion cu tabata bayendo ta un kiebro di relacion.”
E contract di terminacion mes a drenta na vigor Augustus 1, 2021.
Ningun informacion di Utilities NV
Manera ta conoci, Director di Utilities Aruba ing. Richard Eman a bisa siman pasa cu tabatin diferente motibo pakico no tabata mucho contento cu e dos directornan. Pero Eman no kier amplia riba cua ta e motibonan y a bisa cu esey ta un asunto cu mester delibera internamente cu ambos ehecutivo. Durante su presentacion sinembargo, Richard Eman a bisa cu Utilities en todo caso no tabata nada contento cu WEB no por a yega na un acuerdo cu Eagle LNG pa en bes di heavy fuel oil, hfo esta e combustible cu ta usa pa genera coriente y produci awa. Eman a bisa cu LNG no solamente ta mucho mas barata pero tambe mas limpi. Consecuentemente, hasta e trabao di mantencion di ekiponan di WEB lo bira menos caro mirando cu gas ta mas limpi cu hfo.
Richard Eman tambe a ilustra otro iritacion cu e ex ehecutivonan di WEB pa a resisti otro sistema di financiamento. Manera ta conoci, WEB semper a traha cu un consorcio di banco lidera pa AIB Bank. Dos aña pasa a logra otro acuerdo unda lo mester a usa e fondonan pa cumpra ekiponan necesario. Pero Richard Eman a ilustra cu Utilities a dicidi cu mester por a yega na un miho proposicion y asina a pone e financiamento di tanto Utilities, WEB y Elmar hunto y asina a logra un interes mucho mas atractivo. “Pero e tabata obvio cu ehecutivonan di WEB no tabata contento cu e decision ey,” Eman a bisa siman pasa. Eman no a elabora riba e pregunta si ta e dos factornan aki a crea desconfianza, y unicamente a reitera cu a pone un fecha pa dicidi riba e futuro di e ehecutivonan, cu inicialmente mester tabata na Juli, pero cu a keda posponi pa ayera, mirando cu ambos tabata cu vakantie.
Bon Dia Aruba a purba drenta den contacto cu Ing. Eman pa sa mas di e acuerdo, e balor di e ‘golden handshake’ y ken lo reemplasa e dos ehecutivonan, pero ten a ciere di nos edicion, no a drenta den comunicacion cu ing. Eman. Tambe a puntra vocero di WEB ken ta reemplasa Luis Oduber mientrastanto, pero Sra. Dongen ta cu vakantie y a referi na Utilities.
Minister di Energia no ta involucra
Bon Dia Aruba a tuma contacto cu despacho di Prome Minister Evelyn Wever Croes kende ta e titular encarga cu Energia y companianan di utillidad. A informa nos redaccion cu e asunto ta uno interno di WEB y cu Gobierno no tin nada di bisa. A haci e despacho di mr. Wever Croes si ta considerando Sr. Gilberto ‘Junior’ Croes como reemplasante di e Director di WEB. Pero, e contesta tabata mescos. Esta cu nombramento di un futuro Director cu tambe ta keda un asunto interno di Directiva di WEB y su accionista, cu ta Utilities Aruba.
