Un estudio cu a wordo haci y entrega na e gobiernonan di Aruba, Corsou y Bonaire riba e proyecto di un fast ferry pa conecta e tres islanan aki, a mustra cu dos ferry cu ta competi cu otro riba e mesun ruta no ta factibel. Ta bon pa aclaria cu e proyecto aki no tin nada di haber cu e compania Naviera Paraguana, entre Aruba y Venezuela.
Condicionnan
E proyecto di un fast ferry entre e islanan ABC ta factibel, pero si e tres pais di reino Hulandes lo kier bin y garantisa e sostenibilidad di e proyecto aki, e mester cumpli cu cierto condicionnan. Un di nan ta cu e operador mester haya un concesion di 10 aña pa e por recupera su inversion y genera su ganashi.
E estudio aki a wordo haci di tal forma cu e gastonan mester ta esun di mas abou pa ofrece un tarifa accesibel, y mas barata pa transporta e hendenan di e tres islanan aki. Igualmente e echo cu nan ta duna un operador so e concesion aki ta haci cu e gobiernonan di e islanan ABC por exigi como compensacion cu e tarifa cu nan kier introduci entre e islanan ta uno factibel pa nan hendenan.
Sinembargo e compania Venezolano, Naviera Paraguana a yega di informa cu nan tin pensa di cuminsa opera un fast ferry cu den nan prome fase lo cubri e ruta Guaranao-Aruba-Guaranao. Despues nan lo tin pensa di bin cu e di dos fase cu ta inclui Corsou, ademas di Venezuela y Aruba. Na Venezuela a wordo informa cu e ferry aki pa balor di 10.5 miyon dollar a yega caba na e waf di Guaranao. E ta un fast ferry cu capacidad pa 600 pasahero, 120 auto, y seis container y 2 mil meter cubico di carga los. E proyecto aki ta uno PPP entre sector publico y gobierno regional di estado Falcon y gobierno nacional di Venezuela, asina e corant El Universal di Venezuela a informa e siman aki.
E estudio cu a wordo haci pa e gobierno di e islanan ABC ta contempla principalmente e partnernan di Reino Hulandes so. Unabes cu e prome fase aki ta existente, nan a pensa tambe riba un segundo fase cu ta inclui Colombia y Venezuela, tendiendo cuenta cu e vision pa Aruba bira un hub entre Latino America y Europa. Pa realisa e tipo di operacion aki –segun e estudio- mester ta otro tipo di ferry mas slow cu capacidad pa mas carga.
Di e forma aki e deseo di e parlamentonan den Reino Hulandes ta haya espacio, caminda nan a duna e fast ferry un prioridad pa e minister di Hulanda atende cu ne, ya cu e ta bon proyecto pa fomenta e desaroyo economico y e relacion entre e islanan di reino. E ta un proyecto cu parlamentario di PDR, Sr. Andin Bikker tambe ta sostene y a haci esfuerso pa e por bira un realidad.
Estudio FOICE
E estudio aki di fast ferry entre e islanan ta yama FOICE, y e ta uno serio cu a tuma shete aña pa bin cla. E ta un estudio financia pa Fondo Desaroyo Aruba (FDA), pa e tres isla caminda 40 mil dollar a wordo destina pa cada isla.
E rapport aki a wordo entrega caba na e tres gobierno di e respectivo islanan di nos reino na fin di juni ultimo. Te hasta a wordo organisa tayer cu autoridadnan di inmigracion y duana di e tres isla ABC, y tambe cu Hulanda. E autoridadnan aki a brinda tur cooperacion posibel mirando cu e ta un proyecto na bienestar di e islanan aki.
Sinembargo e anuncio cu un compania priva lo desea di brinda parti di e servicio aki, ta trece incertidumbre riba e proyecto original inter-gubernamental entre paisnan di reino den nos region. Igualmente departamento di Duana y Inmigracion a indica den un reunion cu a inclui APA y departamento Maritimo, cu e condicion y logistica no ta cla pa e fast ferry di Venezuela lo por cuminsa opera pronto pa nos isla.
E estudio realisa pa e gobierno di e tres islanan tambe a mustra cu un di e condicionnan pa haci e proyecto aki exitoso ta cu tur e condicion mester t’ey, no solamente di banda di e operador sino di Inmigracion, Duana y otro partnernan envolvi. P’esey e estudio aki ta uno serio pa tene cuenta cu ne prome cu cualkier ferry lo cuminsa opera na Aruba.
Di otro banda, ainda e gobiernonan di Aruba, Corsou y Bonaire mester sinta y defini si nan lo desea di sigui cu e proyecto di un fast ferry entre nan islanan. Segun e estudio realisa e ta un proyecto factibel y sostenibel, ya cu e ta mustra cu hopi trafico di pasahero y di carga lo wordo genera.
Nan a consulta cu agencianan maritimo y demas partnernan envolvi den un tipo di operacion asina, cual nan a mira cu e ta algo sostenibel y e trafico ta bon. E plaso di ehecucion lo ta un aña si gobiernonan di ABC ta bay di acuerdo pa tur condicion, logistica y localidadnan pa nos autoridadnan competente ta cla debidamente.
Operador
Un factor cu lo contribui ta cu e servicio aki lo resulta mucho mas barata y confiabel compara cu e servicionan cu actualmente e companianan aereo ta ofrece. E estudio aki a wordo basa riba e compania grandi mundialmente di ferry Fred Olsen Express cu ta ofrece e servicio aki pa e seis islanan Canarias. Nan ta uza sistema sofistica di telecomunicacion pa atende cu nan itinerario di e pasahero, locual ta facilita cu autoridadnan por haci nan trabou cu tempo y debidamente. E ta un sistema bon hinca den otro cu 20 minuut so e ferry ta permanece den cada waf pa busca e pasaheronan y e carganan.
Fred Olsen Express a contribui cu e estudio aki cu a wordo traha pa e gobiernonan di e tres islanan ABC. Tanto Aruba, Corsou y Bonaire kier a tuma Fred Olsen Express su operacion como ehempel. Ehecutivo di e companianan aki a yega di bishita e islanan aki, y tambe nan a duna recomendacion riba e trafico cu un operacion di un fast ferry lo por genera entre Aruba y Corsou; y Corsou y Bonaire. E fluho lo por ta uno grandi cu nan lo por haci dos operacion. E prome lo cubri e ruta Aruba Corsou y e di dos Corsou Bonaire.
Fred Olsen Express ta interesa den e operacion aki ya cu nan negoshi ta di opera fast ferry. Sinembargo tin un lista di alrededor di 6 operado cu eventualmente lo por realisa e tipo di operacion aki. E opcion aki lo haci atractivo nos producto turistico, ya cu turistanan specialmente Europeo cu lo bin Aruba lo haya e posibilidad tambe di por conoce e otro islanan.
Si e proyecto aki ta haya un bon chens di bira realidad, Aruba a base di su experiencia lo por bin cu campaña di promocion agresivo. Sigur nos lo tin mas di gana cu di perde, ya cu nos volumen di turista ta superior cu e otro dos isla, cu lo bira practicamente un componente di nos producto turistico.
A base di un estudio costo/prijs, e opcion di e ferry entre e islanan ABC lo por ofrece un tarifa hopi abou pa nos bishitantenan. Pues e ta haci mas atractivo e pakete turistico di combinacion cu Aruba, Corsou y Bonaire. E ta algo interesante specialmente pa e turista Europeo cu lo por bishita e tres islanan creando un proposicion turistico nobo di multi destinacion.
