Segun resumen di Departamento di Salubridad Publico DVG riba e desaroyonan di pandemia di coronavirus na Aruba, ayera tabatin dos persona mas cu a fayece di e malesa.
DVG a informa cu e cantidad di fayecido relaciona cu Covid-19 a aumenta na 113, cu fayecimento di dos residente cu edad medio (menos di 60 aña), kendenan tabata interna den Unidad di Cuido Intensivo ICU. Ningun di dos tabata vacuna.
Ademas, DVG a informa cu ayera tabatin 41 persona cu a recupera di Covid-19, y a registra un total di 154 caso nobo di e malesa causa pa e virus SARS-CoV-2. Di e 154 caso nobo, 14 ta turista y 140 ta residente di Aruba. E cifranan aki ta representa un tasa di positividad entre nos residentenan di 37 porciento. E cantidad di caso activo ayera tabata 986.
Segun DVG, e datonan ta ilustra un aumento continuo di casonan, cu un averahe semanal di 113 caso pa dia y un averahe di tasa di positividad semanal di 32 porciento pa dia, cu ta sigui aumenta.
Mientras tanto, den Hospital Dr. Horacio Oduber tin 40 persona interna. Di esakinan, cinco ta den Unidad di Cuido Intensivo ICU, 32 ta riba piso general, dos den piso di maternidad, y uno den pediatria. Datonan di hospital ta mustra cu di e 40 persona in interna pa Covid, diesun ta vacuna sea cu un of dos dosis di e vacuna, mientras 29 persona no tin ningun vacuna pa Covid-19.
