Segun resumen diario di Departamento di Salubridad Publico DVG riba e desaroyonan di e pandemia di Covid-19 na Aruba, ayera lamentablemente dos residente mas a fayece. Cu esaki e total di fayecido pa e malesa causa pa e virus SARS-CoV-2 na Aruba ta 128.
DVG a informa cu ambos residente cu a fayece tabata di edad mayor, y ningun tabata vacuna.
Ademas, DVG a informa cu ayera 70 persona a recupera di Covid-19. A registra un total di 47 caso nobo, di cual 6 ta turista y 41 ta residente. E cifranan aki ta representa un tasa di positividad entre nos residentenan di 22%. Cantidad di casonan activo di COVID-19 ayera tabata 732.
Datonan di COVID ta ilustra casonan nobo cu un averahe semanal di 91 caso pa dia y un averahe di tasa di positividad semanal di 25% pa dia. Ayera tabatin 63 persona interna den hospital cu Covid. 15 di nan ta interna den Unidad di Cuido Intensivo ICU na Colombia. E resto ta na Aruba, di cual 11 ta den ICU y 37 riba piso general.
