Segun resumen di Departamento di Salubridad Publico di cifranan di Covid-19 na Aruba pa ayera, Aruba a conoce dos morto mas pa e malesa.
E personanan cu a fayece, un ta residente y otro no ta residente. Palabra di condolencia ta bay na famia di e fayecidonan.
Pa loke ta trata e cantidad di caso nobo di Covid-19, den e resumen di ayera a registra 55 caso nobo, di cual tres no ta residente. Ademas, 33 persona a recupera. E cantidad di caso activo a keda na 341. A ehecuta un cantidad total di 589 test na e varios localidad na Aruba, entre otro, laboratorio di hospital, laboratorionan priva, y aeropuerto. E tasa di positividad (‘positivity rate’) entre residentenan ta 13%.
Di su banda, hospital Dr. Horacio Oduber a informa cu tin un total di 20 persona interna. Di esakinan, nuebe ta den Unidad di Cuido Intensivo (ICU) y 11 ta isola riba unidad general di Covid. E edad promedio di esnan hospitalisa pa cuido adicional ta 64 aña.
