Dos ciudadano Mericano relaciona cu mercado di energia a declara nan mes culpabel, di duna placa na funcionario halto di Petroleos de Venezuela S.A (PDVSA), cu obhetivo di haya varios contrato miyonario. E empresario Juan José Hernandez, di 51 aña y cu a nace na Weston (Florida) a confesa su mes culpabel di conspiracion pa viola y no cumplimento cu Ley di Practica Corupto na Extranhero (FCPA), Corte di Districto Sur di Texas, situa na Houston a informa. Charles Beech III, di 46 aña cu a nace na Katy (Texas), y cu ta propietario di varios empresa relaciona cu ramo energetico, a acepta cu el a viola FCPA tambe. FCPA ta un ley crea pa combati pago di soborno, desde empresa situa na Merca pa funcionario of empresario publico den exterior. Hernandez a splica cu el a conspira cu Abraham José Shiera y Roberto Rincon, empresario venezolano pa paga soborno y duna hopi cos di balor na funcionario cu ta encarga cu analisa tur compra den PDVSA. Di otra banda Beech a acepta cu el a paga placa tambe na algun funcionario.
E pago cu nan a duna na funcionario di PDVSA a sigura un lugar pa empresanan di Shiera y Rincon, y asina a ser coloca riba lista di licitacion di PDVSA. E situacion aki a permiti cu e empresanan ey por a haya contrato miyonario cu PDVSA. Desde 2008 te 2012, Hernandez a acepta cu tempo cu e tabata gerente general y propietario parcial di e empresa di Shiera, nan empresa tabata esun cu a duna biahe di placer y entretenimento como tambe placa pa funcionarionan di PDVSA, manera Alfonzo Gravina, entre otro. Gravina a declara su mes culpabel tambe na december 2015, pa comete delito di conspiracion pa labamento di placa y pa traha declaracion di impuesto falso. Beech a acepta cu el a paga placa entre 2011 y 2012, cu obhetivo di logra cu su empresa por participa den licitacion di PDVSA. El a reconoce tambe di traha transaccion financiero pa sconde detaye di e pago ilegal aki. Gray H. Miller , Hues Federal cu ta den caso aki, a acepta declaracion di culpabilidad di Beech y Hernandez, kendenan ta hunto cu otro seis persona relaciona cu e delitonan cu a ser splica. Gobierno di Merca a acusa Rincon y Shiera di ta e prome personanan cu ta envolvi den e mafia di corupcion, pa motibo di a paga entre 2009 y 2014 un cantidad di 1.000 miyon dollar, destina na funcionario di halto nivel manera personal di directiva di PDVSA.
E sentencia di Rincon tabata programa pa dia 6 di januari cu a pasa, pero awor ta move pa 14 di juni, fuentenan di Corte di Districto Sur di Texas a confirma.
Petroleo di Venezuela ta bao lupa (vergrootglas) di fiscalnan di Merca, y no e caso aki so, sino pa otro casonan tambe. Husticia di Merca kier sa si gobierno di Venezuela ta usa PDVSA pa laba placa for di narcotrafico, The Wall Street Journal a informa na october di 2015.
