Dialuna autoridadnan di gobierno Cubano a informa cu horcan Irma a laga 10 morto despues di su paso pa Cuba, y a laga hopi daño tambe na e principal lugar turistico di e isla aki.

“Despues cu horcan Irma a pasa riba henter teritorio nacional, gobierno a raporta e perdida di 10 bida humano,” Defensa civil a informa.

E personanan fayeci ta di provincia di La Habana, Matanzas, Camagüey y Ciego de Ávila, na centro y occidente di e isla aki.

Gobierno a comunica e informacion aki,  despues cu nan a  identifica tur victima. Siete di nan a muri na La Habana, corant Cuba Debate y defensa civil a splica.

Entre e victimanan tin un homber grandi cu a cay riba un cable electrico, y un muhe di 77 aña cu a haya un golpi di un palo di luz cu a cay tambe. Otro dos persona mas a muri, ora cu un structura di un cas a cay riba un autobus, caminda nan tabata biaha. Dos ruman a muri tambe ora cu e dak di nan cas a colapse y otro muhe mas a ser haya morto pa autoridad, mientras e tabata flota riba awa, despues cu su cas a keda bao awa.

Tres persona mas a muri na provincia di Matanzas, Ciego de Ávila y Camagüey, pa no pone atencion na tur norma di conducta y pasobra nan a nenga di sali di nan cas,” autoridad a comunica.

Mayoria di persona  a fayece pa motibo di derumbe di varios  edificio. E horcan a causa tambe inundacion na henter costa di Cuba.

Irma no a pordona Cuba, e pais aki  a sufri hopi inundacion na costa nor-occidental, desde Matanzas te La Habana, cu olanan  entre 6 y 9 meter, instituto di meteorologia Cubano a informa.

Cerca di 1, 5 miyon di persona a ser evacua na Cuba, caminda e biento a tumba hopi mata y palo di luz. Lama a elimina un di  lugar mas conoci di Cuba “ Malecon di La  Habana”, y mas awa a drenta tambe na algun zona di e capital Cubano, te na mas di  500 metro di costa. E rafaganan di biento a supera 150 kilometer pa ora.