Asina a informa prome minister Evelyn Wever-Croes dialuna ultimo, na momento cu a sigura cu no ta un caso so sino dos di famia cu mester a sali di nan cas debi na construccion di Watty Vos Boulevard ,pero nan no a haya pago pa nan tereno.

Bon Dia Aruba a publica den su edicion dia 10 di juli ultimo un articulo cu e titulo “Mi wela a sacrifica pa Aruba tin un Watty Vos Boulevard y awor e no tin cas pa biba” exponiendo un caso cu ta trata di un persona mayor y su famia cu for di varios aña ta enfrentando un situacion dificil for di momento nan a haya e notificacion cu mester sali for di nan cas debi cu un proyecto grandi di construccion tabata na caminda.

Pa motibonan di seguridad, Bon Dia Aruba no a publica e nomber di e persona cu a tuma contacto cu redactor sino e historia cu e tabata kier pa comunidad haya sa, esta cu su wela y su famia a sacrifica tur loke nan tabatin y a sali for di nan mesun cas pa awor Aruba por disfruta di un caminda grandi cu tin e nomber di Watty Vos Boulevard; pero awor, nan no tin cas pa biba.

E persona aki a splica cu e historia a cuminsa rond di 20 aña pasa tempo cu e tabatin 10 aña, na unda nan a haya sa cu tabatin un proyecto pa crea un caminda grandi na Aruba cu lo a yuda cu trafico. El a bisa cu durante añanan, diferente instancia y hende a cuminsa acerca e famianan cu tabatin terenonan den areanan unda e proyecto mester a tuma luga.

A acerca na e famia aki na unda nan a bay di acuerdo pa bende nan tereno, un tereno eigendom cu un cas cu tabata un di e terenonan mas grandi di Ponton cu no tabatin ni un debe, manera ta e ta conta. Durante añanan e proceso a tarda y na final nan a dicidi di yuda pueblo bendiendo nan cas y haci e caminda.

Na final di dia, nan a dicidi di bay biba na un cas di huur cu supuestamente gobierno na e momento ey mester a paga pa nan mientras nan tabata haya e placa di e cas cu nan a bende. Te dia di awe, varios aña despues, su wela ni su famia no tin un cas pa biba y tampoco gobierno a paga e cas di huur, pa loke awo e famia tin un debe masha grandi mes.

E caso aki a haya hopi conmocion y reaccion di comunidad. Pa esaki, redactor di Bon Dia Aruba dialuna ultimo a puntra prome minister Evelyn Wever-Croes durante un conferencia di prensa si e tin conocemento di e caso aki y kico ta su opinion al respecto.

Prome minister a señala cu e no por papia di casonan individual pa motibo di privacidad, pero si ta al tanto di e caso. “E decisionnan tuma tempo di Watty Vos Boulevard door di Gobierno di AVP tabata decisionnan hopi descabeya, sin pensa riba e consecuencianan y aworaki a nos ta haya nos ta resolve nan. No ta tur bo por resolve facilmente, algun a tuma mas tempo y tin dos caso no resolvi. Kiermen no un so sino dos, pero m’a compronde si cu nan ta den un fase final di e solucion.”

Ademas, Wever-Croes ta sigura cu esakinan ta casonan hopi complica cu lamentablemente nan por a tene miho cuenta cune e tempo ey y nan no a haci’e. “Pero manera hopi cos, nos ta lora manga y nos ta busca solucion pa nan y ohala cu e Sra. aki ta haya su solucion pronto,” prome minister a bisa.

“Ta berdad cu gobernacion ta un continuacion y p’esey nos mester sigui busca solucion. Pero ora un problema ta hopi complica, lamentablemente bo ta haya notarionan tambe tin cantidad di e tipo di e problemanan aki y varios famia cu bo ta mira cu despues di un fayecimento, ora bo tin herederonan, e cos ta bira hopi complica cu notarionan tambe ta dura 10 of 15 aña riba dje. Tabatin cosnan cu a tuma mas tempo y mi ta kere cu lo tabata mas husto si na e tempo ey caba, a informa nan cu e cos ki no ta bay asina lihe. Pero bueno, awor nos ta trahando den solucion di tur dos caso.” Prome minister a finalisa.

Continuando cu e caso specifico aki, e persona envolvi ta considera cu gobierno y instancianan concerni den e proyecto aki a maneha esaki di mal manera “pasobra con bo ta bay saca un hende bieu di su mesun cas, bo no a pag’e y awor nan ta torturando mi wela, pasobra e otro cas cu awor e ta hinca den dje tin dos aña cu no a ser paga. Nos a contribui y yuda Aruba haya su caminda, pero awor mi famia ta esun cu ta sali perhudica den tur situacion y tur angulo, tanto financieramente como emocionalmente, pasobra e cas tabata di un antiguo generacion, pasobra mi mama y tur mi tantanan a lanta su yiunan eynan, e ta un cas di famia.”

Pa loke ta trata su wela su salud, e ta informa cu poco a poco e situacion aki ta deteriorando su emocionnan. “E ta want’e pero mi ta wak cu e ta bahando peso, e no ta come, e ta preocupa masha hopi mes, pasobra tin dia e ta sinti cu nos no por paga awa cu coriente, e ta sinti hopi descuida y e no ta sinti su mes sigur den situacion aki unda su unico pilar tabata mi welo y e no t’ey mas.”

Den e cas cu nan ta bibando awor, gobierno supuestamente mester a para responsabel pa paga pa esaki y nan ta bibando den dje sin cu gobierno ta paga nada pa esaki manera el a declara.

E doñonan di e cas aki ta bezig cu corte y esey ta un otro preocupacion cu e famia tin na e momentonan aki, debi cu nan no sa na ki momento e doñonan di e cas por pidi nan pa sali for di e luga debi na incumplimento di pago.

“Tur esaki ta un situacion cu ni un hende sa, pasobra tin hende cu no kier pa sali publico kico ta tumando luga aki, e inhusticia cu nan ta haciendo cu mi wela,” el a comenta.

E ta sinti su mes hopi desapunta debi cu e no sa con pa yuda su wela pa sali for di e situacion dificil aki na unda e mes ta sigura cu e “ta sinta den un batata cayente” pa wak con e por yuda su ser stima cu cada dia ta sinti mas tristo.