Mientras Aruba no a bin ‘bij’ ainda di e impacto cu e invasion hudicial na cas di nos ministro encarga cu labor a causa, y ya nos tin otro conflicto cu ta atrae nos atencion. Ministro encarga cu enseñansa ta bay investiga Colegio Arubano den diferente aspecto, entre otro encuanto su maneho financiero.
Den e carta cu e minister a dirigi na obispo Secco ta uza palabranan manera ‘Good Governance’ loke a primera vista ta parce un bon señal: un mandatario cu ta exigi pa cumpli cu normanan di bon gobernacion den caso di un fundacion manera SMOA, cu ta maneha gran parti di nos acceso na educacion superior, ta na su luga. Manera bisa den e carta, e fundacion ta ricibi miyones di placa publico pa percura pa e enseñansa programa tuma luga tambe na un manera debido.
Bon noticia… net na momento cu hopi hende a cuminsa haya duda, si nan no tabatin esey caba, den funcionamento di e actual gobierno segun e mesun normanan di bon gobernacion. No ta trata solamente di e caso di eventual corupcion den ministerio di labor, sino di tur e trayectonan di permiso cu gobernacion conoce, cu a percura pa e duda general ey.
Den su carta e ministro ta anuncia cu e ta bay manda Inspectie di enseñansa y Centrale Accountantsdienst (CAD) pa bay haci control na e scol. Esey pa nos, francamente, ta un sorpresa: ta te awor e entidadnan aki ta bay bishita e scol? Disculpa nos ‘inocencia’, pero nos tabatin e impresion cu e entidadnan aki regularmente tabata haci e control necesario!? Of no… ta nos ta kiboca atrobe: no ta esaki ta dos di e entidadnan di control cu ta ‘heavily understaffed’, dunando e impresion cu e gobierno aki deliberadamente ta percura pa e servicionan aki no por funciona debidamente? Ta asina ta percura cu ‘checks and balances’ den e sistema gubernamental no ta funciona? Y asina e gobierno aki ta haci cu no por cumpli cu un regla di oro den bon gobernacion: percura pa esunnan cu mester controla, ta ekipa pa haci nan trabao. Si bo no por o no kier cumpli cu e regla aki, ya ta bira dificil pa drecha loke no ta bon, pasobra bo no por sa mes kico no ta bon!
Y si e mandatario encarga cu enseñansa ta aplica tal normanan na e entidadnan cu ta ricibi subsidio, esey ta bonbini, pero ta conta pa tur anto. E ta conta tambe pa e parti di gobernacion cu e ministro tin na su encargo. Y kico nos por mira? Un departamento di enseñansa yena cu doctorandus cu tin un serie di proyecto riba tereno di enseñansa ‘den pipeline’ aparentemente eterno, di cual ta nan so ta comprende kico ta e obhetivo, y mas importante ainda, con y ki dia nan implementacion ta bira realidad y con Aruba ta bay beneficia. Mientras tanto e problemanan cardinal di nos enseñansa, pa loke ta contenido y productividad, ta parce di ta eyden manera un huerfano. Nos no por tuma e actual mandatario na malo cu su predecesor a concentra solamente riba drecha edificio, algo necesario pero asina e perde cuatro aña sin haci nada riba drecha contenido, esey ta algo lamentabel. Pero awor e actual responsabel tin tres aña y mey sinta, sin cu nos ta mira algo mehora den enseñansa basico ni avansa.
Den e caso di Colegio Arubano por constata cu tur hende ta rabia y malcontento: e fundacion, rectorado, docente, alumno y mayor, y e ministro tambe. Esey ta noticia ainda? No. Loke lo ta noticia ta cu e mandatario ta formula maneho integral pa enseñansa no publico y publico, pa loke ta maneho y administracion, ‘inspraak’ structura pa docente, alumno y mayornan den maneho di scol. Y prome cu tur cos: cuminsa ekipa e organo di control cu yama inspeccion di enseñansa debidamente y exigi di su direccion cu ta cumpli cu tur tarea. E lunanan cu a resta ainda ta net suficiente pa e mandatario haci un diferencia.
Den e dianan aki atencion ta enfoca riba e aspecto di corupcion den gobernacion, y cu motibo valido. Pero lo ta bon pa uza nos tempo, mas cu specula kico e caso Paul Croes lo trece, pa cuminsa analisa kico mester drecha, pa sikiera nos por papia di un inicio timido den direccion di gobernacion drechi. Nos ta haci un simpel pregunta: ta posibel pa haya ‘ontheffing’ ainda di e control di mercado laboral? Si nada no a cambia, ken tin e pen den su man anto? E actual ministro encarga cu labor? E mes ta firma nan o e otro tambe por firma?
E preguntanan aki no ta pa haci mofa di e ministro interino, pero pa ilustra kico ta e peligro ora e persona en cuestion bay, pero e structura no cambia. Si e ministro en cuestion perde su puesto eventualmente, esey no ta relevante ora mester drecha loke ta daña. Simplemente laga e siguiente bin y dun’e man liber pa ‘business as usual’, esey no por. Straño cu nos no ta tende nada di esey den medionan di comunicacion…
