Un incidente nobo cu botonan Venezolano cu tabata dirigi pa Trinidad y Tobago a sosode diabierna pasa. Dos boto cu tabata transporta koper a zink dilanti di e costa di Cedros, un peninsula na extremo di isla di Trinidad.
E botonan, identifica como Frilay y El Cufi, tabata hiba ocho persona abordo, tur di nan Venezolano.
E botonan a hundi ora Warda Costa tabata hiba nan na e bahia di Staubles. E tripulantenan, kende a ser rescata for di awa, a keda deteni den e bahia te diadomingo den oranan di anochi, segun The Guardian Media.
John Williams, propietario de ABC Trinidad Customs Brokerage Company Limited, a denuncia cu e autoridadnan di e isla no a permiti pa e botonan por yega te e waf di Cedros, aunke a presenta e documentacion rekeri.
“A proporciona e documentacion adecua, no ta cu nan a purba di drenta ilegal na e pais, nan a sigui e proceso y e procedemento necesario pa e boto drenta na T&T cu e fin di realisa transaccionnan comercial”, Williams a indica.
Williams a señala cu su compania a sigura di notifica e autoridadnan 24ora prome di e yegada di e barconan. No obstante, cerca di 8or di mainta di diabierna, ora nan tabata acerca na Cedros, nan a ser deteni pa e Warda Costa.
Autoridadnan di Trinidad y Tobago a manifesta cu e barconan a ser deteni pa motibo cu e documentonan presenta no tabata specifica e carga cu nan tabata hiba abordo. No obstante, Williams a contradeci e version ey y a indica cu e compania a manda un manifiesto pa Warda Costa y Aduana via e-mail pa informa e transporte di koper.
