Informacion di medionan di comunicacion local ta indica cu diaranson ultimo a drenta Aruba dos boto cu persona indocumenta abordo. Kustwacht tabata basta activo y e radarnan no a detecta niun di e dos boto aki.
Den area di Sero Colorado, helicopter di Polis tambe tabata presente conhuntamente cu patruyanan, pero esey no a resulta. Polisnan a haya vestnan y e boto pega riba baranca den area di Rodgers Beach y Kustwacht a tuma e boto aki den beslag, manera e website local MasNoticia.com a informa.
Segun e reportahe di e medio aki, tabatin un otro boto cu tambe a drenta Aruba cu personanan indocumenta e mesun dia, pero no a duna mas detaye di esaki. Por a compronde cu radarnan tanto di Aruba y Corsou no a detecta esaki y autoridadnan tampoco a duna mas informacion.
Mientras tanto, tabata september di aña pasa tempo cu minister di Husticia y di Asuntonan Social, Rocco Tjon a informa riba e instalacion di un radar nobo, algo cu mester a tuma luga na october 2022, “pa asina Aruba por ta hermeticamente cera y di e forma aki ta percura cu e imagennan ta wordo monitorea constantemente. Banda di esaki a añadi un sistema nobo di software pa asina por haci analisisnan mucho mas miho a traves di e radar y na mes momento ta percura pa tin un miho bista.”
Den esaki, minister Tjon a sigura cu nan a haci un “strategisch grens overleg” a haci palabracionnan concreto pa asina entrante October instala un ekipo multi disciplinario cu lo consisti di Kustwacht, Inmigracion, Aduana, Cuerpo Policial y Guarda Nos Costa, pa asina percura cu e radarkamer ta 24 ora pa dia ocupa y di e forma ey desplega e dienstnan mucho mas miho.”
E potret ta di ilustracion y no ta di e dos boto cu a drenta.
