2016 tabata un aña di retonan y di logronan positivo, asina  director di departamento Maritimo (directie Scheepvaart ), Carlyle De Coteau a declara na Bon Dia Aruba. Pero un desafio grandi pa 2017 ta esun di privatisa e departamento aki.

Otro aña nan lo traha formalmente riba proceso di privatisa di departamento Maritimo. Ainda nan ta studiando e manera con nan lo realisa e transicion aki. Ya cu e departamento aki tin cuater obligacionnan: Local, regional, internacional, pero mas importante ta cu Directie Scheepsvaart tin un obligacion cu ta regarda reino Hulandes.

E ultimo di e obligacion aki, ainda nan ta anda con nan por hinca den otro pa asina concretisa e independisacion e departamento aki. Actualmente un grupo ta trahando pa  traha un concepto di privatisacion pa wak con nan lo sali di e situacion aki y bin cu solucionnan pa e minister nobo di Transporte.

Limitacion di personal inspeccion
Un di e prioridad na 2016 tabata di keda drecha e servicio y esaki a bay bon, segun sr. De Coteau. A pesar cu nan tabatin limitacion di personal den e seccion di inspeccion di boto locual a haci cu nan a cay atras, sinembargo e team di e seccion aki a traha duro pa cumpli cu tur inspeccion di boto pendiente. Tambe nan ta trahando riba e forma con pa mehora e proceso di e seccion aki.

“Mi ta sumamente orguyoso como Scheepvaart a bay e aña aki. Mi ta hopi orguyoso di mi team y di henter departamento.”

Encuanto e actividadnan cu ta tumando luga di pafo di nos costa Directie Scheepsvaart a percura pa trece aden entrada den caha di gobierno relaciona cu e uzo di nos awa teritorial.
E  placa cu a drenta tabata mas di loke a wordo presupuesta pa e departamento aki.

3 miyon
Sr. De Coteau ta indica cu pa dos aña sigui  departamento Maritimo ta practicamente auto sostenibel. “Pa di dos aña sigui directie Scheepvaart nos ta costando gobierno di Aruba niun cen.”  E aña aki nan a trece den caha di gobierno un poco mas cu 3 miyon florin. Mientras cu na aña pasa ora cu ley a drenta den vigor pa cuminsa cobra a barconan cu ta parkeer dilanti di nos costa a produci 2.6 miyon florin . Tambe nan tin invoice riba caya alrededor di 300 mil dollar cu mester wordo cobra ainda pa servicionan cu a tuma luga despues di  november ultimo y cu e lo drenta pa otro aña.

E suma produci pa departamento Maritimo na 2016 ta un bon cifra, considerando cu no tin mucho barco tanker, ya cu e mercado di petroleo a cay y no a recupera ainda. Tambe nan a diversifica nan servicio pa nan clientenan cu ta haciendo uzo di nos awanan maritimo; y esey a yuda pa trece cen aden.

Tin companianan cu tin barco para dilanti di nos costa cu no ta haciendo nada, y nan ta haci uzo di nos awa pa parkeer un rato te ora cu e mercado lo drecha.   Igualmente departamento Maritimo ta papiando cu mas agencia cu  ta mirando oportunidad pa desaroya proyectonan.

Control di beach
Encuanto e Beach Policy, sr. De Couteau ta bisa cu departamento Maritimo no tin mucho di bisa, ya cu e maneho aki ta mas tanto pa departamento di Infrastructura y Planificacion (DIP). E contribucion di departamento maritimo ta solamente e parti di control pa inspeccion si e ekipo of material cu e compania acuatico ta uzando  ta den bon estado, pero e no tin di haber exclusivamente cu dunamento di permiso pa e compania acuatico. E ta bisa cu nan inspeccion ta mas riguroso, y aunke nan tin e instrumento legal pa duna boet, ainda nan no a duna niun boet. “Esey no ta intencion tampoco si tur hende ta cumpli cu regla.”

Desafionan
E di dos desafio grandi tin di haber cu “off shore” of dilanti di nos costa pa atrae mas posibilidad di negoshi pa e area di “transhipment’ y area di mantencion.  Bon Dia Aruba a puntra si e tipo di actividad aki no ta afecta nos medio ambiente maritimo?

E ta contesta cu e intencion ta pa haci e trabou aki sostenibel pa protege e medio ambiente maritimo.  “Pueblo di Aruba por ta trankilo. No tin niun actividad cu ta tumando luga eynan. Nan no tin niun petroleo abordo, mi ta papiando di e drill ship. Nan no tin petroleo, nan ta djis hancra eynan of parkeer.”  Pa loke ta e tanker nan ta keda mas zuid di Aruba entre 7 pa 9 miya pafo, caminda hopi di nan no tin carga di petroleo; pero otro si ta carga cu diferente sorto di combustibel.

E ta enfatisa cu for di 2012 nan ta trahando riba puntonan clave pa garantisa e actividad aki:

1. E mester ta sostenibel.
2.E no mester ta dañino pa e medio ambiente maritimo.

E ta bisa cu nan ta hopi stricto pa controla e operacionnan di cerca di e barconan staciona afo. “Labamento di tanknan no ta tumando luga mas. Tampoco otro tipo di actividad cu lo por nifica contaminacion di nos awa maritimo. Igualmente e barconan crucero no ta tirando nada pafo di nan. “Nos ta hopi na haltura di  kico tur ta haciendo.”

Plataforma na costa
Pa traha riba e dos puntonan menciona ariba, nan a logra aclaria varios asunto cu ta pasando pafo di nos costa. E aña aki nan tabatin un diferencia cu e sector hotelero debi na e presencia di dos embarcacion entre nan un plataforma pabou di Aruba, pero nan a logra atende esaki hunto cu Ahata y e hoteleronan.

Sinembargo nan ta spera cu e sector hotelero, sector di Ahata, por realisa cu antes  tabatin cantidad di boto te hasta ocho cu tabata para pabou di Aruba. Y awor nos ta mira dos of tres te hasta cuater so pa luna. Sin embargo nan ta tumando na cuenta e sector di turismo a pesar cu cos cu a yega di sosode den pasado, no por sigui bay mescos awendia. E barconan grandi  riba lama  ta parkeer un tiki mas pazuid den un area specificamente pa nan pa no afecta a bunita bista di bahada di solo cu nos turistanan kier disfruta di dje.