Mas cu 2 aña pasa nos compania di awa y coriente WEB a contamina awa y un parti di costa pa motibo di un leak den un heater di tanki number 4. Departamento di Medio Ambiente a traha un rapport unda ta mustra riba e fayo di e compania y e caso a bay Ministerio Publico tambe pa asina sanciona WEB. Sinembargo Bon Dia Aruba no por mira niun accion ainda riba e caso aki.

Mas cu un aña y mey Bon Dia Aruba ta puntrando Ministerio Publico via mail, telefon y Whatsapp ki dia nan lo tuma un decision pa sanciona WEB. Como cu for di Departamento di Medio Ambiente e tabata hopi cla cu WEB no a cumpli cu e reglanan di alerta e instancianan y asina e contaminacion por a plama na un area mas grandi.

WEB mes a admiti cu nan no ta haci mantencion preventivo, den sentido cu e tempo ey nan no a haci un analisis di riesgonan di full e planta na Balashi. E leak den e heater por a sosode pasobra e no ta un luga mucho visibel pa asina por controla e estado structuralmente. Mester bisa cu un incidente asina semper por sosode pero e compania no a tene cuenta cu esaki por pasa y asina no tabatin medidanan preventivo pa evita cu e azeta por leak den awa.

Banda di esaki tabatin un otro incidente cu a sosode un poco despues unda un gran cantidad di pisca a muri. Den e caso aki WEB tampoco a actua adecua, asina Departamento di Medio Ambiente a constata e tempo ey. Nan a manda e rapportnan aki pa Ministerio Publico (OM), sinembargo na dado momento OM a insisti cu nan no a haya e rapportnan aki ainda. September aña pasa vocero di Ministerio Publico a contesta Bon Dia Aruba cu e fiscal lo tuma un decision e siman ey ainda. Sinembargo despues no a tende nada mas. Contando e e-mailnan so cu Bon Dia Aruba a manda riba e dos casonan menciona ariba, nan ta core den mas cu 20. Bon Dia Aruba tambe tin un peticion desde october pa un entrevista cu e hefe maximo di Ministerio Publico, e procureur-generaal Alex van Dam, pero te ainda no e PG aki no kier a sinta cu nos. Mientrastanto sr. Van Dam a indica na un encuentro cu prensa cu e ta pro transparencia. Varios otro medionan na Aruba si a haya un entrevista cu e PG.

Siman pasa Bon Dia Aruba a compronde di e vocero cu e PG no kier papia di casonan di medio ambiente como cu leynan na Aruba no ta asina leu. Sinembargo tin leynan, hasta e codigo penal, cu husticia por uza pa sanciona.