Na januari 2021 tanto WEB Aruba NV como refineria di Aruba a firma convenio cu Eagle LNG LLC, pa establece suministro di gas natural likido na WEB pa usa na luga di Heavy Fuel Oil (HFO), y den caso di RdA NV pa establece e punto di entrada di gas natural riba nan tereno y pa explora e posibilidadnan di entrega di gas na cliente den exterior. Asina Aruba lo sirbi como punto di inicio y referencia di Eagle LNG den nos region.
Dos aña despues di e firmamento di e acuerdonan, Bon Dia Aruba a tuma contacto cu e representantenan di tanto WEB Aruba NV como di Eagle LNG na Aruba cu algun pregunta pa haya un actualisacion di e situacion.
Banda di e preguntanan relaciona cu e estado actual di preparacion di e instalacion, inclusivo e trayecto cu e tuberia di gas di San Nicolas pa Barcadera mester haya, otro preguntanan cu a puntra ta ariba e perspectiva tocante e comercialisacion di gas natural den e region, den bista di e hecho cu mayoria di mercado di cierto tamaño ya tin suministro di gas natural di otro compania.
Tambe a puntra cu mayoria di pais mayor den region cu disponibilidad di LNG caba tin solamente perspectiva limita pa bende LNG cu otronan?
Kico ta e status actual di refineria, como potencial cliente di LNG y si ta kere den e reactivacion di refineria cu uso di gas.
Kico ta e status actual di e trayecto di tuberia di gas, specificamente na Savaneta unda mester pasa riba tereno di Marinierskazerne y si lo mantene e trayecto original.
Por ultimo a puntra ariba e situacion actual di mercado internacional di gas natural, cu nivel di rijs halto pa motibo di e guera na Ucrania; esaki ta haci dificil e desaroyo di e proyecto na Aruba na nivel di prijs competitivo?
Representantenan di WEB NV a indica cu ta Eagle LNG ta encarga cu e projecto, y e preguntanan mester keda dirigi na nan. Bon Dia Aruba a manda pregunta na representantenan di Eagle LNG Aruba, pero no a logra haya contesta prome cu e ciere di edicion.
Riba potret: Eagle LNG a tene un sesion informativo cu comunidad di Aruba dia 13 di juli 2022.
