Horcan Dorian a suta nort di Bahamas como un catastrofico tormenta Categoria 5 ayera. Su bientonan record di 185 mph a ranca dak, bolter auto y ranca cabelnan di coriente mientras centenares di persona a busca refugio den scol, iglesia y shelter.
Dorian a dal Elbow Cay den Islanan Abaco pa 12:40pm, y despues a subi tera atrobe cerca di Marsh Harbour pa 2pm, despues cu autoridadnan a haci suplica di ultimo momento pa evacua.
“Ta devastado”, segun Joy Jibrilu, Director General di Ministerio di Turismo y Aviacion di Bahamas. “Tin daño enorme na propiedad y infrastructura. Cu suerte, no a reporta perdida di bida.”
Dorian a empata e record pa horcan Atlantico mas poderoso pa subi tera den historia, igualando e horcan di Labor Day na 1935, prome cu a cuminsa duna nomber na tormentanan.
E unico tormenta den record cu tabata mas poderoso tabata horcan Allen na 1980, cu biento di 190mph, pero cu no a subi tera cu e forsa ey.
A reporta ‘condicion catastrofico’ den Islanan Abaco, y tabata spera cu Dorian lo subi Grand Bahamas ‘cu tur su forsa’. E horcan tabata move west cu 7km/h.
Den algun parti di Abaco, ‘no por mira e diferencia unda caya ta cuminsa versus unda lama ta cuminsa’, segun Prome Minister Hubert Minnis.
Gobierno a habri 14 shelter rond Bahamas. Decenas a ignora orden di evacuacion, segun oficialnan. “E final por ta fatal”, segun Samuel Butler, Asistent di Comisionado di Polis. “Nos ta suplica boso pa yega un luga sigur.”
Entre esunnan cu a nenga di bay shelter tabata 32 persona na Sweetings Cay, un pueblo piscado di algun cientos di persona como 1.5m riba nivel di lama, y un grupo cu a busca siguridad den Old Bahama Bay Resort, cual oficialnan a bisa no ta sigur.
Durante dos of tres dia, e horcan por basha te hasta 1m di yobida, ademas di biento, segun meteorologo priva, Ryan Maue. Vocero di gobierno a bisa cu Dorian por afecta 73mil residente y 21mil hogar. Autoridadnan a cera aeropuerto pa Islanan Abaco, Grand Bahamas y Bimini, pero Aeropuerto Internacional Lynden Pindling den capital Nassau a permanece habri.
