Un di problemanan subraya den e doorlichtingrapport, y cu ya caba ariba varios ocasion a trece pa dilanti di parti di e veld di enseñansa, specificamente e maestronan, ta e falta di oportunidad pa e maestronan profesionalisa nan mes y refresca nan conocemento pa brinda un miho educacion.
Bon educacion ta caracterisa pa lesnan efectivo, den cual e studiantenan por haci uso optimal di nan capacidadnan. Esaki ta rekeri un vision comparti ariba e accion pedagogico eficaz y adecua pa e grupo of gruponan obhetivo, e implementacion practico y sostenibel di e medidanan di mehoracion, e atencion structural pa e promocion di e maestronan y e liderazgo educativo explicito.
E grupo di trabou su observacion ta cu e proceso di enseñansa y aprendisahe na e scolnan di Aruba generalmente ta keda cortico den e aspectonan aki. E grupo di trabou ta considera cu e desaroyo di un bon sistema di siguransa di e calidad y promocion di un bon cultura di calidad ta hopi importante.
Durante e observacion di e les- y combersacionnan cu e scol- y institucionnan, a bin pa dilanti repetitivamente algun obstaculo- y inkietudnan. E obstaculonan aki ta referi na e enfoke educativo y e siguransa di calidad di educacion y esakinan no tabata limita na algun scol so of un solo sector.
Inspectie Onderwijs tambe a confirma e obstaculonan aki identifica y a comparti e preocupacionnan expresa pa e sector educativo. E grupo di trabou ta deduci di esaki cu e siguiente preocupacionnan ta di caracter structural.
E enfoke educativo den klas no ta adecua
E grupo di trabou a tuma nota di diferencianan importante den e calidad di e lesnan. Nan a wak diferente ehempel , pero mas frecuentemente, e lesnan no tabata suficientemente efectivo. Na hopi scol e instruccion ta evidente, pero hopi biaha e studiantenan ta wak cu nan maestro ta papia pa hopi tempo.
Nan a indica cu nan a wak cu e maestronan ta preocupa principalmente pa duna informacion. Tin tiki interaccion funcional entre e alumno y e maestro y den hopi caso e maestronan tampoco ta presta suficiente atencion na e alumnonan cu no ta compronde e splicacion di biaha.
E docente no ta profundisa su mes suficiente den e problema cu e studiante ta experimenta, como resultado di loke e studiante ta ricibi como ayudo of comentario specifico no ta suficiente y e oportunidadnan potencial di aprendisahe no ta wordo probecha.
Ademas, nan ta enfatisa cu e docentenan no ta conta cu suficiente herment pa enfrenta e problemanan linguistico di nan alumnonan. En general, falta un enfoke di henter e scol pa identifica y aborda adecuadamente e desbentahanan.
Falta un sistema di siguransa di e calidad of no ta suficiente na hopi di e scolnan.
E grupo ta splica cu frecuentemente tin falta di un sistema di siguransa di calidad cu ta proporciona e directiva di e scol informacion ariba e calidad di e proceso di enseñansa y aprendisahe y cu ta usa e informacion aki pa evalua y implementa medidanan di mehoracion. Tin tiki of nada di evidencia di un vision educativo ariba cual por basa e gestion.
Den klas, nan ta indica, hopi biaha no ta existi un sistema cu cual e docentenan por desaroya nan studiantenan cu e meta di adapta e educacion na e necesidadnan educativo y di apoyo di e studiantenan aki. Pafo di klas hopi biaha tin falta di un ciclo di entrevista cu e personal cu e personal den cual ta analisa e desaroyo cu ta coincidi cu e ambicionnan di e scol.
Tin falta di un cultura di calidad of e no ta suficiente na hopi di e scolnan.
E grupo di trabou a ripara cu na hopi di e scolnan a desaroya te na cierto punto un cultura na unda e docentenan ta traha pa mehora educacion ariba e base di un idea comparti ariba e calidad educativo. No ta trata di bay riba un enfoke dirigi na resultadonan of un liderazgo di e tipo aki.
Hopi biaha tin falta di un plan di profesionalisacion. A pesar cu ta pone poco atencion structural na e desaroyo di e docentenan y nan oportunidadnan di formacion, e grupo di trabou ta subraya cu e participacion, e compromiso y motivacion di e docentenan pa brinda educacion na e studiantenan den e circunstancianan aki ta impresionante.
Tin tiki of ningun espacio y presupuesto pa e desaroyo profesional.
E scolnan mester trata cu alumnonan cu diferente necesidadnan di apoyo y antecedentenan socioeconomico. Pa adapta e educacion na e necesidadnan di e studiantenan, e grupo di trabou ta haya ta necesario un miho formacion di e maestronan, locual ta rekeri suficiente recurso.
E falta di un sistema di siguransa di calidad y e ausencia di un cultura di calidad na hopi di e scolnan ta haci cu e proceso di e enseñansa y aprendisahe no ta suficiente. E studiantenan ta siña menos di loke nan por siña, specialmente si ya caba nan ta experimenta problemanan di enseñansa of di lenguahe.
E grupo di trabao ta recomenda establece un sistema di siguransa di calidad na e scolnan dirigi, entre otro, riba e calidad di e accionnan pedagogico di e docentenan. Esaki ta beneficia e uso di e potencial di e docentenan y tambe di e studiantenan.
Evaluando regularmente e proceso di enseñansa y aprendisahe, e resultadonan, y tumando medidanan di mehoracion ora cu ta necesario, por fortalece e docentenan, e alumnonan ta ricibi e educacion cu ta ahusta na nan necesidad y talento y ta contribui na un cultura di calidad na e scolnan.
E grupo di trabou ta remarca cu un condicion pa establece cu exito un sistema di siguransa di calidad na e scolnan ta e acuerdo di e vision pedagogico ariba nivel escolar y un bon liderazgo educativo.
