E investigacion realisa den sector di educacion, doorlichting rapport, a subraya diferente problema cu tin riba diferente area cu ta afectando, pa añas caba, e calidad di educacion na Aruba. Un di e recomendacionnan cu e grupo di trabao encarga cu e investigacion a presenta en e rapport, ta pa organisa un sistema di registro confiable y sostenible pa cifranan clave.

E rapport ta enfatisa cu un politica eficiente ta rekeri un percepcion di calidad di educacion.

Esaki ta inclui e entrada, progreso y salida di e studiantenan pa cada tipo di educacion, e desaroyo di e puntacionnan final y examennan cu tempo, si tin of no suficiente personal capacita, e diferencia entre e scolnan y con Aruba ta compara cu otro paisnan.

Actualmente e panorama aki no ta completo, por lo tanto e formuladornan di politica, e directivanan escolar y otro partidonan interesa ta haya nan mes limita den e gestion eficaz di e promocion di calidad.

E grupo di trabao ta recomenda desaroya un sistema di registro confiable y sostenible pa cifranan

clave. Pa esaki nan ta propone un plan stap pa stap den cual e pais mester determina prome ki

rekisitionan e sistema mester cumpli cune y despues ta introduci den fase.

Nan ta remarca cu e lucha pa un miho calidad educativo ta cuminsa cu e determinacion di e

situacion actual y determinacion di e situacion obhetivo. Esaki ta rekeri un fuente di datos

importante y confiable.

Datos ta un recurso esencial pa e formuladornan di politica, e directivanan escolar y otro partidonan interesa. Datos no solamente ta yuda identifica e deficiencianan y establece prioridad- y metanan, pero ta yuda tambe midi e progreso y evalua politica- of intervencionnan selecciona.

E obhetivonan cu por wordo midi y cu plazonan determina ta presta na e direccion y ahuste ora cu ta necesario.

Rapportnan estadistico anual di Directie Onderwijs

E rapport ta splica cu desde aña escolar 1985/1986 e Departamento di Investigacion y Estadistica di Directie Onderwijs a pone na disposicion di Minister di Enseñansa datonan educativo sin procesa pa su analisis posterior. Cu e obhetivo aki, e directivanan escolar ta proporciona e datonan na Directie Onderwijs, manera cu ley ta indica.

E rapportnan estadistico anual ta mustra e conteo di educacion primario, secundario y di formacion profesional superior financia pa e gobierno. Esaki ta referi na e cantidad di alumnonan categorisa pa sexo, region di residencia, idioma cu ta papia na cas, pais di nacemento, como tambe e cantidad di studiantenan cu ta ripiti, e cantidad di klasnan, e tamaño di e klasnan y e proporcion alumno/docente na cada scol.

Esaki ta referi tambe na e cantidad di docente categorisa pa sexo, edad, pais di nacemento, idioma cu ta papia na cas, estado civil y competencia. Ta inclui tambe dato di transferencia di educacion primario pa secundario y dato di salida y transferencia di EPB. Ta presenta e cantidad di alumnonan y maestronan pa educacion cu no ta wordo financia pa gobierno, categorisa pa genero.

Finalmente e rapport anual ta inlcui e resultadonan di examennan di diferente sector educativo como tambe un conteo di e personal di docente di apoyo, oferta y demanda di e docentenan y e cantidad di prestamonan estudiantil (studielening) otorga.

Pa e grupo di trabao algo cu a yama nan atencion ta e descargo de responsabilidad desde aña 2010/2011 cu debi na problemanan tecnico ta usa diferente fecha di conteo di entrada y salida di alumnonan cu no necesariamente ta coresponde na eventonan actual.

Otro factor cu a yama atencion ta e ausencia di rapportnan estadistico anual despues di aña escolar 2016/2017. E riesgo ta visibel aki pa loke ta confiansa y continuidad di informacion.

Ademas falta datonan di transferencia pa educacion special, mavo, havo, vwo, EPB y EPI y

datosnan di ingreso pa EPI, IPA y HBO.

Ademas di e rapportnan anual menciona anteriormente, Directie Onderwijs ta publica documentonan separa ariba nan website cu ta contene serienen cronologico tocante e cantidad di studiante, docente y scol, gasto den educacion, participacion, esnan cu ta ripiti, resultado di examen y studielening.

Rapportnan anual di Inspectie Onderwijs

Desde algun aña caba, e rapport ta indica, Inspectie Onderwijs ta publica rapport anual di educacion primario, educacion secundario general y formacion profesional. E rapportnan anual aki ta agrega parcialmente hunto cu rapportnan estadistico anual di Departamento di Educacion.

E rapport anual di educacion primario ta contene datos ariba e tamaño di e klas, resultado di enseñansa, serienan temporal, transferencia di educacion primario pa educacion secundario, transferencia di alumnonan di e tres scolnan MLK y e scol ZMLK, cantidad y motibo di suspension y expulsion den educacion primario special y regular.

E rapport anual di educacion secundario ta contene dato di e cantidad di studiantenan na cada scol, resultado di enseñansa, ariba nivel nacional y escolar, pa educacion secundario inferior y superior, mavo, havo y vwo, como tambe resultado di examennan mavo, havo, avond havo, vwo, landsexamen y IPA. Ademas e cantidad di suspension y motibo ta wordo informa spera pa mavo y havo y vwo y ta wordo categorisa pa sexo.

E cifranan di transferencia pa educacion superior – mercado laboral, hbo, wo, IPA, EPI – no ta

disponibel.

E rapport anual di formacion profesional – SPO, EPB, EPI, IPA, Scol di Polis, OAA – ta mustra e cantidad di klas, alumno (categorisa den sexo), personal docente (categorisa den sexo) y tamaño di e klasnan pa cada scol. Resultado di examen, pa SPO y EPI (categorisa pa sexo), resultado di enseñansa, cantidad di suspension y e motibo pa EPB, SPO y eliminacion na EPB.

E grupo di trabao ta enfatisa cu e descripcion general anterior ta mustra, di un banda, cu e datonan relevante ta parcialmente documenta y publica pa e publico general. Di otro banda e suministro di informacion tin varios aña escolar di retraso, parti di e informacion ta wordo publica solamente pa Directie Onderwijs y otro parti solamente pa Inspectie Onderwijs y e panorama actual no ta completo.

Loke falta, por ehempel, ta dato di e salida di alumnonan den educacion special, EPI y HBO y dato di e admision di alumnonan pa EPI, IPA y HBO. Esaki ta stroba e caminda di un analisis di e careranan escolar, e exito anterior y e problemanan di conexion. Pero, segun nan ta indica, falta tambe datonan tocante e cualificacion, socialisacion y financiamento di educacion.