Den e doorlichitng rapport di educacion, e grupo di trabou encarga cu e investigacion den e sector di enseñansa ta indica con e recomendacionnan cu nan a sugeri por ser elabora y implementa di un bon manera. Tambe nan ta vincula esaki cu plan- y recomendacionnan anterior y actual.

E analisis di e grupo di trabou di e problemanan den e capitulo di fortalecemento di e sistema di educacion ta mustra cu tin deficiencia structural den e sistema dentro di cual educacion ta funciona. Sinembargo, nan ta indica, ta hopi importante cu e contexto den cual educacion ta tuma luga, e condicionnan bao di cual educacion por prospera miho, ta na ordo.

Pa un miho precision di e recomendacionnan di e sistema—recomendacion 9 te cu 13—e grupo di trabou a desaroya un plan di accion pa e siguiente temanan: Financiamento (incluyendo supervision), gobernacion y legislacion. Den e edicion aki nos ta elabora ariba e tema di gobernacion y legislacion.

Gobernacion

Pa loke ta trata recomendacion number 9 ‘Desaroya un structura di gobierno madura’, e grupo di trabao a enfoca den e organisacion di educacion publico. Dienst Publieke Scholen (DPS) ta e directiva escolar di educacion publico y ta depende di e Minister di Enseñansa. Como resultado, e scolnan publico tin falta di un directiva cu poder cu por actua como un contrapartida independiente for di gobierno y, por lo tanto, ta miho capacita pa salvaguardia y fortalece e continuidad y e funcion vital di educacion na Aruba.

A base di e analisis di e problema, e grupo di trabao ta recomenda privatisa educacion publico y transferi esaki pa un fundacion administrativo.

Den 2022, Plus Accountants na Aruba, dirigi pa Sr. Anthony G. Croes, a keda designa pa investiga e organisacion di DPS, incluyendo e proceso di responsabilidad financiero. E estudio aki, e grupo di trabao a indica, ta enfoca den e gestion financiero di DPS. Entre otro cosnan, ta bay presta atencion na e costonan general den DPS, e economia di escala cu ta logra, e fluho di placa di tercera y costo di personal.

Den ultimo instancia lo elabora y emiti diferente rapport y recomendacion basa riba e investigacionnan realisa. E investigacion ainda ta den curso, tur e combersacionnan a tuma luga, pero ainda e datonan no ta disponibel y por lo tanto, ainda no a wordo investiga. E expectativa ta cu e estudio ta wordo completa den e corto plaso y emiti e recomendacion.

E grupo di trabao ta remarca cu ta importante pa averigua pakico e privatisacion di DPS no por a keda realisa prome, pakico e no ricibi suficiente apoyo. Di e manera aki, por obtene un miho vision di cualkier obstaculo.

Un posibel obstaculo, nan a señala, pa e privatisacion di DPS tin di haber cu e situacion huridico di e personal (condicion di funcionario publico). Nan ta subraya cu ta importante comunica claramente na e personal di educacion publico cu un cambio den e posicion legal no ta bay tin consecuencia desfaborabel y incluso por tin bentaha den e structura nobo.

Tambe por considera e medidanan transitorio pa e personal existente. Esaki por nifica, por ehemplo, cu solamente e personal bao un schedule nobo y e personal actual por transferi lentamente. Ademas, e grupo ta agrega, tambe ta importante comunica e proposito y e beneficionan di e privatisacion. Esaki por wordo realisa, por ehemplo, señalando menos carga administrativo y mas espacio pa e tumamento di decision.

Na momento di ahusta e structura di DPS, e obhetivo ta establece un directiva independiente y cu poder cu por actua como contrapartida di gobierno. Tambe e lo mester conduci na un miho comprension di e recursonan financiero di e educacion publico.

E grupo di trabao ta destaca cu actualmente no ta existi un rindimento di cuenta financiero anual separa. E ahustenan na e structura no ta relaciona solamente cu e privatisacion di DPS, si no tambe cu e organisacion di e scolnan cu ta cay bao di e autoridad di DPS.

Dos ahuste cu segun e grupo di trabao mester investiga y elabora mas profundo ta e desconexion di EPI y e desconexion di IPA y despues e integracion di IPA y Universidad di Aruba. Esaki ta rekeri e fortalecemento di e marco pa educacion superior.

Un condicion previo importante (tambe pa largo plaso) ta cu e ahustenan na e structura di DPS mester ta factibel den e practica. E grupo do trabao ta señala cu por ehemplo, mester tin suficiente personal den e directiva escolar publico. Ademas ta importante pa conta cu un bon guia di procesonan pa e organisacion y implementacion di e ahustenan. Nan ta menciona cu por ta por aplica un model di crecemento den cual ta logra e independencia completo a traves di diferente paso.

Finalmente, e grupo ta accentua cu mester garantisa e derecho na educacion. Ora cu DPS ta independiente, e principio aki mester ta ancra den e constitucion di e fundacion.

Legislacion

Pa loke ta trata recomendacion 11 ‘Proporciona legislacion actualisa y educa’, e grupo di trabao ta enfoca den e structura di e ordenansa nacional den materia di legislacion educativo.

Ademas di e aspecto di legislacion, tres punto specifico cu segun e grupo di trabao ta importante ta: e legislacion pa educacion superior, e legislacion pa educacion vocacional y legislacion pa e supervision di educacion. A base di e analisis di e problema, e grupo di trabou ta recomenda actualisa e legislacion educativo y priorisa e legislacion pa educacion superior, e formacion profesional secundario y e supervision educativo.

Na 2022, Aruba a nombra un lider di proyecto pa organisa y realisa un actualisacion di e legislacion educativo. Den e proyecto aki e atencion ta enfoca den ahusta e marco di e legislacion educativo, e ordenansa nacional. Di e manera aki por establece un base sostenibel pa e legislacion educativo.

Nan ta splica cu mester a establece varios grupo central pa e proyecto, cada un di cual ta bay traha cu nan propio ley. Pa cada tipo di educacion, diferente persona ta participa den e grupo central corespondiente, incluyendo oficialnan di DEA, Huristanan di DEA, Hurista DWJZ y un inspector di Inspectie Ondwerwijs Aruba.

Prome cu e comienso di cada legislacion, e grupo si trabao a sigui splica, un memorandum ta wordo completa. Un momerandum di iniciacion ta un format fiho pa e legislacion nobo, elabora pa Directie Wetgeving en Juridische Zaken. Ta importante pa e politica ser elabora y adopta pa e por wordo traduci den e legislacion. Esey tabata e enfoke di atencion den e lunanan cu a sigui..

Dentro di e proyecto, e prioridadnan inicialmente ta basa den e elaboracion di e memorandum di iniciacion di e Ordenansa Nacional di Supervision di Educacion y e Ordenansa Nacional di Educacion profesional.

Den un ultimo instancia, e grupo di trabao ta agrega, e proyectonan di ley mester wordo presenta na Parlamento di Aruba pa su tratamento. E momento cu e ta bay drenta na vigor ta depende di e tratamento aki.

Un condicion previo importante ta cu suficiente politico y abogadonan legislativo cu conocemento huridico mester t’ey presente pa por mantene y actualisa e legislacion educativo ora cu ta necesario.

E grupo ta indica cu na final di october di 2022, e abogadonan oficial di politica y e inspectornan mester a ricibi e capacitacion den derecho educativo di lider di e proyecto pa actualisa e legislacion educativo. Ademas, ta contempla e posibilidad di realisa un curso pa abogadonan legislado.

Na momento di actualisa e Ordenansa Nacional, ta bay examina tambe unda tin interaccion cu e otro recomendacionnan cu tin di haber cu gobernacion.

Pa loke ta trata gobernacion, e grupo di trabao a mira e interpretacion di e termino ‘autoridad competente’ pa e scolnan publico, entre otro. Asina cu completa e memorandum di iniciacion, ta bay elabora ideanan concreto pa esaki. Pa loke ta e financiamento, e ahustenan ta bay ta inclui den Decretonan Nacional y Reglamentonan Ministerial. Esaki ta fuera di e alcance di e proyecto aki.

Ta coresponde na e grupo di proyecto di actualisacion di legislacion educativo pa sigui traha riba e detaye- y e ahustenan sustantivo adicional cu ta rekeri. E stakeholders ta participa den e preparacion di e memorandum di iniciacion y e proyecto di ordenansa nacional.