Di e 13 recomendacionnan presenta den e doorlichting rapport di enseñansa un di esunnan cu mas prioridad ta e politica linguistica, e escogencia di un idioma di instruccion pa educacion na Aruba.

‘Taalbeleid’ (politica linguistica) ta e segundo recomendacion y den esaki ta boga pa un selecccion indudabel y consistente den e politica aki. E rapport ta indica cu e situacion actual ta preocupante pa loke ta e punto aki. Ta eixsti un liña di areglonan cu ta bay for di solamente Hulandes como idioma di instruccion a traves di scolnan cu dependiendo di e docente ta usa un combinacion di Hulandes y Papiamento, hasta scolnan cu ta participa den e proyecto SAM (SEO/Arubano Multilengual).

Segun e rapport ta sigui indica e prestacion y uso di talentonan di e studiantenan di Aruba a wordo afecta hopi pa e situacion aki cu no ta defini completamente. Aworaki a cuminsa cana e proceso pa un politica pa implementa SAM na tur e scolnan primario di Aruba, cu Papiamento of Hulandes como idioma di instruccion, segun e poblacion di studiantil den cuestion. Tambe ta realisando esfuersonan pa capacita e docentenan di scolnan secundario y nan ta bay siña con pa duna instruccion na Hulandes na studiantenan cu Hulandes no ta nan lenga materno.

Den e tussenrapport presenta na 2022, e grupo di trabou a recomenda pa e minister di enseñansa haci prome un eleccion explicito pa loke ta e politica linguistico. E grupo di coordinacion di e politica linguistico ya caba a wordo designa pa e proposito aki. Nan ta coordina e proceso di establecemento di un politica linguistico integra den educacion y na december 2022 a emiti un conseho tocante esaki. E conseho aki ta discuti si ta continua of ahusta e politica linguistico actual.

Den e revision di e educacion na Aruba e grupo di trabou a encontra, e rapport a remarca, cu actualmente no ta existi un practica linguistico consistente den e veld di enseñansa y a señala e problemanan cu esaki tabata causa. E recomendacion den e tussenrapport ariba e idioma di instruccion den e diferente sectornan educativo ta haci un eleccion politico cla pa loke ta trata e politica linguistico di Aruba.

“E grupo di trabou tin como opinion cu e punto aki ta un eleccion politico. Pais Aruba ta elegi Hulandes of Papiamento como idioma di instruccion, un modelo multilengual como SAM of otro modelo. E grupo di trabou ta conseha tuma e decision aki ariba e base di diferente scenarionan cu ta brinda informacion ariba e condicionnan anterior, e necesidadnan, e efectonan y riesgonan. E pensamento hipotetico aki a wordo asumi pa e minister di enseñansa mediante e creacion di un Grupo di Coordinacion di Politica Lingustico,” e rapport a indica.