(AP) – 3 di e nacion su companianan mas exitoso y grandi di delivery di cuminda ta demandando New York City tocante e limite di costonan adicional cu nan a pone den vigor durante e pandemia, pa proteha e restaurantnan cu a ricibi golpi di e clausura obligatorio di nan establecimento.

E ciudad a sigui extende esaki hasta den bista cu e vacunacionnan aworaki ta permiti mas comemento den restaurant, cual segun e companianan ta costando miyones di dollar durante e temporada.

Den e demanda entrega na U.S District Court for The Southern District of New York, DoorDash, GrubHub y Uber Eats ta yama e limite aki un inhusticia di parti di gobierno. E limite aki ta nifica cu tin un tarifa maximo cu e persona por paga, sin importa e trabao cu e empleado eherce, ni si esaki ta overtime of no. E companianan ta bisa cu nan tabata “instrumental den e mantenemento di e restaurantnan y e industria di cuminda, y asina tambe sigura cu e empleadonan por mantene nan trabao” despues di inverti miyones di dollar den alivio pa e negoshinan aki.

Nan ta entregando e demanda, pidiendo un orden unda cu ta prohibi e ciudad di pone den vigor un extension di e limite aki cu a ser poni den augustus.

E companianan ta pidiendo compensacion monetario no detaya pa e dañonan causa, y tambe un huicio na corte cu hurado.

New York Law Department su vocero Nicholas Paolucci a bisa den un e-mail cu e ciudad su iniciativa ta un manera legalmente acepta y lo ser defendi den corte.

E ciudad di New York prome a pone e limite aki den mei 2020, como un respuesta na e pandemia, limitando e cantidad cu e companianan aki por cobra un restaurant pa nan servicio na 15% pa un pedido haci online y servicio di delivery, y 5% pa tur otro servicio, incluyendo publicidad.

Luna pasa, New York City Council a aproba un cantidad grandi di proposicionnan haci unda cu ta bisa cu lo yuda restaurantnan chikito, manera prohibi cierto servicio di delivery cobra e restaurantnan aki, y pone mandato cu nan number di telefon, mester ta poni riba e sitio web di e companianan unda cu ta brinda e servicio di delivery.

Tambe a trece dilanti un extension di e limite aki cu no lo caduca te cu comienso di otro aña.

Companianan cu servicio di delivery manera Grubhub, DoorDash y Uber Eats entre nan, cu a experiencia un exito tremendo durante e pandemia, ta teniendo varios problema cu e gobiernonan local cu ta bisa cu restaurantnan y e consumidornan ta lidiando cu prijsnan demasiado halto.

Luna pasa oficialnan di Chicago a acusa DoorDash y Grubhub di a causa daño na e restaurantnan y nan cliente pa medo di cobra tarifanan halto y otro practicanan di decepcion. Companianan di delivery tabata enfoke di autoridadnan legal den otro estadonan y ciudadnan antes, pero e esfuersonan aki tabata contra polisanan specifico di e compania, compara cu Chicago su atake contra varios elemento di e companianan aki su operacion. E companianan a yama Chicago su demanda sin base.

San Francisco su abogado di districto a acusa companianan di delivery di viola ley di California pa causa di clasifica e chauffeurnan como contratista. Y Washington, D.C., a yega un acuerdo cu DoorDash den aña 2019 despues di a bisa cu e compania a duna mal informacion tocante e tip cu e chauffeurnan ta ricibi.

E oficina di Massachusetts su abogado general a pone un demanda den contra di Grubhub, acusando e compania di cobra restaurantnan tarifanan ilegalmente halto durante e pandemia, E estado a limita e tarifanan pa mayoria di aña 2020.

Den e demanda di diahuebs, Grubhub, DoorDash y Uber Eats ta argumenta cu New York City continuamente ta keda pospone e dia unda cu e limite di tarifa lo stop di ta den vigor, y aworaki no tin un dia mas di esaki, haciendo cu e ta keda algo permanent. Tambe nan a alega cu e ley a costa e companianan miyones y miyones di dollar den e luna di juli.

“E ordenansa no ta constitucional pa motibo di entre varios cos, e hecho cu e ta interferi cu e negoshi y palabracion liber entre e plataforma y e restaurant pa medio di cambia y dicta e terminonan economico riba cual e industria dinamico ta opera,” e demanda a declara.

Companianan di delivery di cuminda, ademas di ta negoshinan aumentando den exito, a trece un variedad di resultado economico, te hasta ora cu nan a ser converti den un servicio critico durante e pandemia.

Pedidonan maneha pa DoorDash a yega un nivel cu no a ser premira durante su kwartaal mas recien y mientras cu e aumento di ganashi a baha di velocidad desde e punto mas fuerte di e pandemia, e compania a bisa cu e benta te ainda a subi cu 84%, na un cantidad di 1.24 biyon dollar.

Sinembargo, e compania a perde 102 miyon dollar. E companianan mester inverti sumanan grandi pa por crece y companianan cu ta cuminsando di delivery ta bisa cu esaki ta hopi mas pio cu antes pa motibo cu nan ta forsa di inverti mas placa den atraccion di chauffeurnan nobo den bista cu infeccionnan ta aumentando. DoorDash a bisa cu e limite di tarifanan aki a costa nan 26 miyon durante e periodo mas recien di 3 luna.

Den un declaracion prepara, DoorDash a bisa cu e limite riba e tarifanan por hiba na prijsnan mas halto pa e cliente y causa daño na e chauffeur si e cantidad di pedidonan baha pa causa di e prijs halto aki.

“E hecho di impone control permanent riba e prijsnan ta un acto peligroso y inhusto di e Gobierno, y lo limita e opcion cu e companianan chikito tin di competi den un mercado cu cada biaha ta bira mas competitivo,” e compania a bisa.