Doñonan di trailer no ta cumpliendo cu keuring pa tin un miho seguridad den trafico

Control di trailer tanto pa boto como seadoo, entre otro, cu na Aruba ta usa pa companianan di watersport ta algo cu tin preocupacion di hende. Dienst Technishe Inspecties (DTI) a afirma na Bon Dia Aruba cu e control no ta tumando luga manera mester ta, debi na algun doñonan di trailer mes cu no ta atende cu esaki.

Tabata dia 8 di juli ora Aruba a haya un noticia di un accidente pisa basta serio cu hende herida na Bakval. Tabata trata di un accidente unda un trailer di boto a los y a bay drenta den un auto cu tabata coriendo den direccion contrario, e chauffeur a resulta seriamente herida.

Pa cu esaki, Bon Dia Aruba a tuma contacto cu (DTI) pa asina ey por informa comunidad con e control di e trailernan ta na e momentonan aki na unda a bin dilanti cu esey no ta tumando luga manera mester ta pa evita e accidentenan manera esun di 8 di juli ultimo.

Pa esaki, dos funcionario di DTI di nomber Francis Quandt, ken ta fungi como chef di Veiligheids keuring y Sylvio Werleman, chef di Stoomwezen, a tene un entrevista cu Bon Dia Aruba unda nan a sigura cu den e Landsverordering wegverkeer ta para cu tin dos categoria di trailer (aanhangwagen) grote aanhangwagen y kleine aanhangwagen. Entre nan ta existi un diferencia di kilogram, lo cual ta menos di 400 kilogram pa kleine aanhangwagen y mas di 400 kilogram pa grote aanhangwagen y depende di e dos categoria tin cierto rekisitonan pa keuring.

Esaki ta loke ta poni den ley pero cu e doñonan di trailer ta presenta pa haci keuring ta un otro cos diferente, manera Quandt a señala, “ta un responsabilidad di e doño di trailer pa haci keuring cada 1 aña,” el a bisa.

Si ta trata di un klein aanhangwagen nan ta controla e bol, ta controla e mecanismonan pa core di un manera sigur como e structura, loke ta acopla na e vehiculo, si ta den bon estado, si e mecanismo ta wanta e peso na unda el a informa cu e trailer mester tin reflector den e parti patras cora, ademas e plachi number di e trailer mester tin luz.

Pa grote aanhangwagen, den categoria aki nan ta controla full e mecanismo, e wairanan cu ta acopla na e vehiculo debi cu ora e vehiculo ta break e mester tin e luz tambe cendi, luznan di verlichting, richtingaanwijzing na cada banda, plachi number tambe mester riba e trailer, y nan ta check e dos cadena cu mester pa extra seguridad cu si algo mester pasa cu e bol faya of algo asina e cadena ta wanta.

Pero pa loke ta trata control, ta Cuerpo di Polis e departamento encarga di controla si e trailernan tin su keuring actualisa pa asina e vehiculonan aki por core riba caminda publico sin cu nan ta representa un peliger pa un accidente manera a sucede caba dia 9 di juli ultimo.

Ley ta indica cu e keuring mester ta cada aña, pero manera a indica caba, ta keda responsabilidad na e doño di e trailer pa haci e keuring na DTI na momento cu nan ta registra cerca nos, e otro siguiente añanan cerca e fecha cu e keuring tin cu tuma luga, nos ta avisa nan cu un carta, pero e keuring ta keda na responsabilidad di e doño pa presenta akinan pa nos tine den sistema, cada aña nos ta avisa, pero si nunca bo no a bin, nos no tin’e den nos sistema,” Werleman a sigura.

Di su parti Quandt ta sigura cu “den cinco aña cu mi tin trahando na DTI nunca mi a mira ni un di e dos categoria aki presenta pa un keuring, loke ta representa un peliger.”

Bon Dia Aruba tambe a puntra minister encarga cu Transporte, Ursell Arends, ken a informa cu dos siman pasa nan a crea un task force cu ta consisti di diferente departamentonan, lidera pa departamento di Transporte Publico, Cuerpo di Polis, Ministerio Publico, Aruba Tourism Authority (ATA) Departamento di Impuesto (DIMP) na unda cu pa dia 21 di augustus manera el a sigura, e companianan cu tin trailer por regla nan papelnan.

Despues di e fecha aki lo tin un reunion cu tur compania envolvi cu esaki ta bay cuminsa un control, minister Arends ta esun encarga di duna un verguning pa un compania di watersport segun el a indica, un bes cu e compania ta cuminsa opera e ta bay bira un otro departamento cu mester controla e trailernan aki manera mester ta pa mehora e cumplimento di reglanan.

Cu esaki, manera minister Arends a afirma, no solamente ta bay cuminsa controla loke ta trata UTV y ATV manera a informa dia 10 di juli mediante un conferencia di prensa, sino tambe e trailernan cu mester cumpli cu leynan ya cu e accidente cu a tuma luga 8 di juli no ta prome biaha cu ta sucede, pero si ta lamentabel debi cu e persona afecta por a hasta fayece pa motibo di no haci un keuring na e vehiculonan aki cada aña manera ley ta indica.