Diaranson ultimo, diferente doño di centronan di cuido di mucha a tene un conferencia di prensa pa anuncia comunidad e aumento di prijsnan di nan servicio debi cu nan mester cumpli cu exigencianan di ley di kinderopvang y cu esey nan ta haya gastonan extra cu mester paga.

Pa esaki, Marelyn Martijn a sigura cu nan ta elogia esnan cu a y ta sigui lucha pa e cuido di e muchanan na Aruba keda uno di calidad, “nos como doñonan di diferente centro di cuido ta di acuerdo cu ley di kinderopvang y tur cambionan necesario cu mester haci pa mehora e cuido di nos muchanan. Nos ta haciendo nos best for di ora cu e ley a drenta den vigor pa cuminsa haci e cambionan necesario cu ley ta exigi.”

Pa por cumpli cu e diferente rekisitonan cu ley ta rekeri ta costa cen, entre otro pa infrastructura, inverti den material, paga extra personal y pa e motibo aki nan a tuma e decision cu nan tin cu aumenta e suma nan prijsnan.

E motibo mayor di aumento di prijs ta debi na e ratio cu ta para den ley. Ratio ta un cantidad specifico di mucha segun edad cu por ser cuida door di 1 leidster, e ratio a ser implementa pa por brinda un miho calidad di cuido pa e muchanan den un grupo mas chikito di mucha.

E ratio ta lo siguiente:

0-1aña 6 baby pa leidstser

1-2aña 10 mucha pa leidster

2-3aña 12 mucha pa leidster

3-4aña 13 mucha pa leidster

4-6aña 14 mucha pa leidster

6-12aña 16 mucha pa leidster.

Pero nan como centronan di cuido, nunca a traha cu ratio y cada un centro di cuido tin nan cantidad di mucha cu ta cubri e gastonan di e scol pa e por sigui opera, manera Martijn a señala.

“E cantidad aki no solamente ta pa cubri nos gastonan pero tambe pa cubri tur aña na luna di juli ora e muchanan di peuter klas ta bay kleuter y nos ta perde un gran cantidad di mucha, akinan nos entrada ta baha drasticamente y ta tuma algun luna pa haya mucha back. Tambe ta pasa cu mayor ta kita nan yiu for di centro di cuido sin aviso di un momento pa otro y esakinan ta loke ta afecta nos entrada y pues pa e motibo aki nos no ta traha cu un ratio, nos ta traha cu un cantidad cu por cubri nos gastonan pa e bahada di entrada na luna di juli y ora mayor kita na yiu sin pre aviso, na final di luna nos si mester cumpli cu tur nos gastonan di nos centro, sin importa cu nos tin menos mucha of no.” El a sigura.

Awor, nan ta sigura cu ta exigi pa nan traha cu ratio, cu ta un cantidad specifico y nan ta bay tin cu haci algun cambio pa por cumpli esaki, entre otro, busca extra personal pa cubri e extra muchanan cu normalmente nan ta traha cune y manera el a menciona, tur esaki ta costa nan scol hopi placa, por ehemplo, salario pa e leidster, belasting, SVb.

“Centro di cuido ta un negoshi priva y tin su gastonan cu mester cumpli cune pa por sigui brinda nan servicio, pero si ley ta exigi centronan traha cu menos mucha pa cada leidster nos tin tres opcion pa haci esaki posibel,” el a bisa.

Nan a pone como opcion, traha cu e cantidad di mucha cu ta ser exigi den ley cual ta menos mucha y e consecuencia ta cu nan como crèchenan no lo por cubri nan gastonan mas mirando cu e entrada lo ta menos y na final mester cera nan crèche y no por sigui brinda cuido pa e muchanan.

Di dos opcion ta pa traha cu e cantidad cu ley ta exigi cual ta menos mucha cu consecuencia cu nan entrada lo bira menos y e prijsnan di cuido mester subi pa nan por cubri nan gastonan mirando cu nan mester manda algun mucha cas pa por traha cu e cantidad exigi.

Di tres opcion ta cu ta traha cu e cantidad di mucha cu ley ta exigi y mester busca extra leidster pa cubri e muchanan cu ta surpasa e cantidad di exigencia cu consecuencia cu nan mester paga un salario extra, belasting y SVb y e prijsnan di cuido mester subi pa nan por cubri e gastonan extra.

Nan ta di opinion cu “centro di cuido di Aruba tin hopi aña ta purba mantene nan prijs abou teniendo na consideracion e mayornan. Aworaki pa nos por cumpli cu e exigencianan di ley ta bin varios gasto extra y sin conta cu tambe durante tur e aña cu salario a subi, awa y coriente a subi, comestibel, etc. Pa tur e motibonan aki nos centro di cuido a dicidi cu nos tin subi nos prijs, nos no por cubri tur e gastonan cu ta bin acerca cu e suma mensual cu nos ta cobrando pa cuido di mucha na e momentonan aki.”

Pa 1 di augustus prijs di centro di cuido di mucha lo subi
 Pa esaki Martijn a splica cu cada centro lo stipula su prijs basa riba su gastonan individual pa maneha su centro, e aumento di prijs lo ser introduci den fase y no completo den un biaha.

Cada centro lo avisa mayornan di adelanta e suma y durante ki lunanan di e aña lo subi, algun centro a cuminsa avisa mayornan caba y algun ya a cuminsa haci aumento di prijs, nan a señala cu nan tin un flyer cu nan lo comparti cu mayornan cu informacion di aumento di prijs.

Nan tambe ta avisa cu no tur centro lo haci e cambio aki, algun centro no ta perhudica door di e cambionan aki y pa awor a dicidi no haci cambionan, pero gran mayoria di centro na Aruba si ta perhudica y ta sinti obliga pa haci e aumento di prijs pa por cumpli cu tur exigencianan di e ley.

Esnan cu mas ta perhudica mas ta e centronan cu ta cobra un averahe di 350 pa 500 florin pa luna pa full dia of 200 pa 350 florin pa mita dia/traimerdia.

Nan tin e preocupacion cu na ningun momento nan intencion ta pa aumenta nan prijsnan “pero nos no tin otro alternativa pero nos tin cu cumpli cu exigencianan di ley, ademas nan sa cu gran parti di mayornan tin un entrada di salario minimo y si tin 2 of 3 yiu ta bira pisa pa nan paga cuido pa nan yiu, tambe nos ta consciente cu algun mayor no lo afford di paga centro di cuido mas, nos no kier pa nos muchanan ser perhudica door di e cambionan aki cu mester tuma luga pa por cumpli cu ley.”

Como solucion, nan pensa cu Aruba por implementa subsidio pa mayornan manera ta sucede na Hulanda, unda cu esey ta un ayudo grandi pa mayornan pa por cubri e suma mensual di centro di cuido pa nan yiu, “di nos banda nos ta spera cu Aruba por yega na un subsidio pa nos mayornan lo mas pronto posibel.” Martijn a finalisa.

Minister di Asuntonan Social, Rocco Tjon su reaccion
 Den un declaracion di minister Tjon manda na medionan local, e mandatario a señala cu tur centronan di cuido mester cumpli cu e ley pero esey ta bay den fase, ademas a sigura cu “Gobierno no ta dicidi e prijs di un speelschool esey ta e doño cu riba su gastonan ta dicidi kico ta e prijs,” el a sigura.

Den pasado casonan lamentabel a tuma luga y nan kier evita pa esey lo sigui sucede, den materia aki ta tene na cuenta cu diferente aspecto unda gobierno ta yuda speelschool pa por cumpli cu e ley den fasenan, pa esnan cu tin mas gasto, no tin manera di haci inversion di inmediato pa motibo cu seguridad di e muchanan ta keda un punto importante y tin diferente tipo di infraccion pa esey.