(NLTimes) – Hopi studiante ta bibando den casnan friu pa causa di e costonan halto di energia. Doñonan di cas ta pone e calefaccion extremadamente baho y esaki ta causando discusionnan cu e studiantenan tocante kico un temperatura aceptabel pa biba ta, AD a reporta despues di a papia cu e studiantenan y asociacionnan di studiante.

“Nos ta tende for di varios studiante cu ta ser laga den friu pa e doñonan di cas kendenan diripente ta baha e calefaccion,” Joram van Velzen di e union di studiante LSVb a bisa na e corant. E union di studiante ISO tambe a ricibi reportahenan similar.

Un studiante na Utrecht a reporta cu e calefaccion ta solamente den e sala of area comun di su cas di studiante. Su persona y su compañero di camber mester drumi den sweater y mea.

“Esaki ta sumamente inaceptabel, y e lo bira un peliger pa nan salud si e tempratura bira mas friu,” Van Velzen a declara. “Doñonan di cas tambe mester spaar nan costo di energia pa medio di inverti den ‘double glazing.’” LSVb anteriormente a uni na organisacionnan ambiental pa pidi gobierno prohibi ‘single glazing’ riba tur bentana na e casnan.

Studiantenan tin tempo ta lidiando cu e prijs di energia desde cu gobierno a dicidi cu nan no ta cualifica pa e subsidio di energia cu tin e meta di yuda hogarnan di ingreso baho lidia cu e prijsnan di energia cu ta aumentando causa pa Rusia su invasion di Ucrania.

Studiante den varios ciudad a cuminsa tuma e problematica aki na corte. Corte na Arnhem a declara cu exclui studiantenan for di e subsidio aki ta discriminacion, sinembargo gobierno a mantene nan posicion y nan decision. Segun Minister carola Schouten di Politica di Pobresa, agencia di educacion ehecutivo DUO no tin e informacion necesario pa implementa e subsidio di energia pa e studiantenan cu tin mester di esaki. Segun su persona, un alternativa na esaki ta compensa tur studiante, y esaki lo ta demasiado caro na 200 miyon euro.

E medidanan pa cu energia lo tuma efecto dia 1 di januari na tur vivienda incluyendo studiantenan. Bao di e medidanan aki, viviendanan lo paga un tarifa mas baho pa gas averahe y consumi di electricidad. Consumo cu ta riba di e averahe aki lo ser cobra bao tarifa di e mercado.