Cilo citylounge aruba (3).JPG
Diabierna pasa Warda Nos Costa a detene e doñonan hunto cu un otro persona di personal pa motibo cu nan papelnan di estadia no tabata na ordo. Sinembargo hues comisario a dicidi di laga nan den libertad pa motibo cu nan detencion tabata ilegal. 
Esaki e abogado representando e doñonan Jhoemily Hidalgo y Yvan Moya. Nan ta splica cu nan ta doño pa 50% di Cilo City Lounge cu ta un establecimento popular situa na Renaissance Marketplace.  
Nan ta duna nan version di e diabierna pasa. Warda Nos Costa a bay indicando cu nan a extende nan estadia sin permiso. Sinembargo nan tabatin un permiso prolonga pa keda na Aruba como turista, segun e doñonan. 
Despues e detencion, e autoridadnan a informa e abogado cu e doñonan ta deteni y cu nan lo wordo deporta e siguiente dia. Esey a pone  cu e abogado bay den apelacion  contra e ordo di detencion, mirando cu nan papelnan ta den tramite. E abogado ta bisa cu ley ta stipula cu ora un persona ta accionista cu tin 40 porciento of mas di un compania, cu tin un capital social di un suma di  50 mil  of mas nan ta haya un permiso di  residencia y un di trabou. Pero esaki ainda tabata pega na Dimas, e instancia di gobierno cu ta procesa permiso di estadia. 
Ora cu e abogado a bay dilanti hues comisario, el a dicta cu nan detencion ta ilegal y mester a laga nan den libertad di biaha. Segun e abogado e no por ta asina cu Aruba ta promoviendo den exterior den e caso aki na Venezuela como destinacion pa inversion. Y cu tin programanan na television y den otro medionan cu ta trece e punto dilanti pa inverti na Aruba y bin biba aki pa asina stimula nos economia cu capital conduciendo na mas trabou. Pero ora cu personanan di exterior ta bin nan ta haya nan mes confronta cu e realidad cu autoridadnan ta bin deteni nan mientras na un otro instancia gubernamental e documentonan ta keda pega